Հայաստանը կարող է համարվել Եվրասիական տնտեսական միության հիմնադիր անդամ. Արտակ Զաքարյան

Հայաստանը շարունակում է հետևողականորեն իրականացնել Մաքսային միության անդամակցության ճանապարհային քարտեզով նախատեսված քայլերը և պատրաստ է մասնակցել ՄՄ շրջանակներում տեղի ունեցող զարգացումներին: Այս մասին մայիսի 7-ին լրագրողների հետ հանդիպմանն ասաց ԱԺ արտաքին հարաբերությունների մշտական հանձնաժողովի նախագահ Արտակ Զաքարյանը: «Մենք շարունակում ենք հետևել Մաքսային միության շրջանակներում տեղի ունեցող զարգացումներին և հետևողականորեն իրականացնում ենք այդ կառույցին անդամակցության ճանապարհային քարտեզով նախատեսված քայլերը»,- ասաց Զաքարյանը:

Նա նշեց, որ Հայաստանն այս պահին իրականացրել է ճանապարհային քարտեզով նախատեսված ծրագրերի հիմնական մասը՝ կարծիք հայտնելով, որ առաջիկա մեկ ամսվա ընթացքում Հայաստանը կստորագրի Եվրասիական միասնական տնտեսական տարածքին միանալու փաստաթուղթը, որը պատրաստման փուլում է: «Մինսկում ՄՄ անդամ երկրների նախագահների վերջին հանդիպման ժամանակ քննարկվում էր նաև Հայաստանի հարցը, որտեղ նաև նշվեց, որ Եվրասիական տնտեսական միության Հայաստանի անդամակցության փաստաթուղթը պատրաստ կլինի հունիսին»,- ասաց Զաքարյանը՝ նշելով, որ ստորագրելով այդ փաստաթուղթը՝ Հայաստանը դառնում է Եվրասիական տնտեսական միության հիմնադիր անդամ, որտեղ որոշումները կայացվում են կոնսենսուսի միջոցով:

Անդրադառնալով հարցին, թե ինչու ՀՀ նախագահը չի մասնակցել ապրիլի 29-ին Մինսկում կայացած Եվրասիական բարձրագույն տնտեսական խորհրդի նիստին' Արտակ Զաքարյանը նշեց, որ Հայաստանը ՄՄ և Եվրասիական տնտեսական միության անդամ չէ, ուստի չէր կարող մասնակցել այդ հանդիպմանը:

2013 թվականի սեպտեմբերի 3-ին Հայաստանը հայտարարեց Մաքսային միությանը միանալու և հետագայում Եվրասիական տնտեսական միության կազմավորմանը մասնակցելու ցանկության մասին: