Գագիկ Խաչատրյանն անհարկի համարեց այլընտրանքային հարկային ստուգումների ներդրումն իր անձի հետ կապելը

ՀՀ ֆինանսների նախարար Գագիկ Խաչատրյանը հերքեց լրատվամիջոցներում տարածված այն լուրերը, որ «Հայաստանի Հանրապետությունում այլընտրանքային հարկային ստուգումների մասին» ՀՀ օրենքի նախագծի ընդունումը կապված է իր անձի հետ։ Լրագրողների հետ զրույցում նա հիշեցրեց, որ բիզնեսի այն հատվածը, որը ռիսկերի համակարգում է, ստուգվում է, իսկ մնացած հատվածը տարբեր պատճառներով չի ստուգվում։ «Հաշվապահին ստուգելու, փայատերերի և օտարերկրյա ներդրողների հետ հարաբերությունները ճշտելու համար բիզնեսին հետաքրքիր է հարկային փաստաթուղթը, աուդիտը: Երբ ռիսկերի համակարգը ձևավորեցինք, ընդամենը մեկ տարում 1267 ձեռնարկություն հայտնաբերվեց: Մենք ունենք 85 հազար ձեռնարկություն: Մնացած ձեռնարկությունները, որոնք ուզում են ունենալ հարկային աուդիտ, պետք է նրանց հնարավորություն տալ դիմել հարկային մարմին, իսկ ով ուզում է ֆինանսական աուդիտ՝ դիմել աուդիտորական ձեռնարկություններին»,- ասաց Խաչատրյանը։

Խոսելով այն մասին, թե ինչո՞ւ նախկինում չէր արվում այս նախաձեռնությունը և արդյո՞ք դա պայմանավորված է իր նոր կարգավիճակով՝ Ֆինանսների նախարարը նշեց, որ նախաձեռնությունն ավելի վաղ է սկսվել և անցել է քննարկումների փուլեր։ «Համակարգը ներդրվում է նաև գործարար շրջանակների խնդրանքով»,- ասաց նա։

Պատասխանելով այն հարցին, թե որքանո՞վ էր նպատակահարմար խոշոր ընկերություններին պարտադիր աուդիտից ազատելը, նախարարն ասաց, որ պարտադրված որևէ բան հաճելի չէ բիզնեսի համար: «Աուդիտի գաղափարն այն է, որ ուղղորդես բիզնեսին և այն ինքնուրույն հայտարարագրվի: Հարկային աուդիտն ասում է նույնը, ինչ ասում է պարտադիր աուդիտը: Ինչո՞ւ պարտադրենք: Բիզնեսին թույլ տանք որոշել՝ հարկային աուդի՞տ անի, թե՞ ընտրի մյուսը: Մենք ամեն ինչ պետք է անենք բիզնեսի բեռը թեթևացնելու համար»,- ասաց նախարարը։