Հայաստանում բնական հավելաճի գործակիցը նվազել է մահացության աճի պատճառով

Հայաստանում ընթացիկ տարվա առաջին եռամսյակում նախորդ տարվա համեմատ ծնելիության ու մահացության ցուցանիշներն աճել են: «Ծնվածների բացարձակ ցուցանիշը 2014-ի առաջին կիսամյակում կազմել է 9 հազար 789 մարդ, մահացածների ցուցանիշը կազմել է 8 հազար 098, բնական հավելաճը կազմել է 1691: Ծնելիության աճը կազմել է 2.2 տոկոս, մահացության դեպքերը աճել են 7.7 տոկոսով: Նախորդ տարի բացարձակ ցուցանիշը եղել է 2 հազար 61 մարդ, աճի գործակիցը կազմել է 2.8 պրոմիլ' այս տարվա 2.3 պրոմիլի համեմատ, ինչը նշանակում է, որ 0.5 պրոմիլային կետով այս եռամյսակում նվազել է բնական հավելաճի գործակից մահացության թվի ավելացման հետևանքով»,- լրագրողների հետ հանդիպման ժամանակ ասաց ՀՀ Ազգային վիճակագրական ծառայության մարդահամարի եւ ժողովրդագրության բաժնի պետ Կարինե Կույումջյանը:

Մշտական բնակչության թվաքանակը, որն Ազգային վիճակագրական ծառայությունը ճշգրտում է յուրաքանչյուր եռամսյակը մեկ, վկայում է, որ նախորդ տարվա նույն ժամանակահատվածի համեմատ մշտական բնակչության թիվը նվազել է 15 հազար 100 մարդով: «Եթե 2013 թվականի ապրիլի 1-ի դրությամբ մշտական բնակչության թիվը կազմել է 3 միլիոն 12 հազար 900 մարդ, այս տարվա ապրիլի 1-ի դրությամբ 3 միլիոն 028 հազար: Այս ցուցանիշը, եթե համեմատելու լինենք տարեսկզբի հետ, 2014 թվականի հունվարի մեկի դրությամբ բնակչության թվաքանակը նվազել է 4 հազար 500 մարդով, բնական հավելաճը կազմել է գրեթե 1700 մարդ, իսկ միգրացիայի ցուցանիշն առաջին եռամսյակին կազմել է 6 հազար 200 մարդ»,-նշեց Կարինե Կույումջյանը:

Նրա խոսքով' մահացությունների կեսից ավելին գրանցվում է արյան շրջանառության խանգարման հիվանդություններից: «Գրանցված 8 հազար 098 մահվան դեպքերից 51 տոկոսը պայմանավորված է եղել արյան շրջանառության խանգարման հիվանդություններով, 18 տոկոսը` նորագոյացությունների հետևանքով, շնչառական օրգանների հիվանդությունից մահացածները կազմել են 7 տոկոս, մարսողական օրգանների հիվանդություններից մահացել է ընդհանուր մահացածների 7 տոկոսը: Դժբախտ պատահարներից, թունավորումներից, վնասվածքներից առաջացած մահվան դեպքերն էլ կազմել են 4 տոկոս»,-ասաց բանախոսը' շեշտելով, որ աճ է գրանցվել արյան շրջանառության խանգարման հիվանդությունների հետևանքով մահացածների դեպքում, ինչպես նաև աճել են մարսողական հիվանդություններից մահացածողների դեպքերը, նվազել է նորագոյացություններից մահացության դեպքերը:

«Մանկական մահացության ցուցանիշն ընթացիկ տարվա առաջին եռամսկայում նվազել է. գրանցվել է 81 դեպք` նախորդ տարվա 84 դեպքի համեմատ, իսկ յուրաքանչյուր 1000 կենդանի ծնվածի հաշվով գրանցվել է 8.3 պրոմիլ մանկամահացության դեպք` նախորդ տարվա 8.8 պրոմիլի համեմատ»,-ասաց Կարինե Կույումջյանը: