Ռուս-հայկական հարաբերությունները գտնվում են աննախադեպ բարձր մակարդակի վրա. ՀՀ-ում ՌԴ դեսպան

Հայաստանում Ռուսաստանի դեսպան Իվան Վոլինկինը «Ноев Ковчег» ռուսալեզու պարբերականին տված հարցազրույցում հայտնել է, որ ռուս - հայկական հարաբերությունները գտնվում են աննախադեպ բարձր մակարդակի վրա: 

Այն հարցին, թե ինչպես ընդունեց պարոն Վոլինկինին Հայաստանը և ինչ տպավորություններ նա ունի, դեսպանը պատասխանեց. 

«Կարող եմ ասել, որ Հայաստանում եղած առաջին իսկ օրերին ինձ մոտ առաջացան ամենաբարի և դրական զգացողությունները: Ես եկել եմ այստեղ լավ զգացմունքներով և մեծ ուրախությամբ: Այստեղ հանդիպեցի ջերմ, հյուրընկալ ազգի, հանդիպեցի շատ լավ մարդկանց և Հայաստանում ձեռք բերեցի հրաշալի ընկերներ: Սովորեցի և տեսա նորն ու հետաքրքիրը:  Ես կարող եմ ասել, որ իմ աշխատանքային առաջին տարին ինձ տվեց մեծ տպավորություններ ու դրական հույզեր: Ես կարծում եմ, որ իմ հետագա աշխատանքը նույնպես կընթանա այդ դրական տպավորություններով: Նման ակնկալիքները կապված են երկրի ակտիվ և հետաքրքիր կյանքով. ներքին քաղաքական կյանքը դինամիկ է, երկկողմ հարաբերություններն աճ են գրանցում, մշակութային և հասարակական միջոցառումները շատ և բազմազան են: Ինչ վերաբերում է մշակութային կյանքին` ուզում եմ ասել, որ իմ բոլոր սպասելիքները գերազանցվեցին:  Ես չէի էլ պատկերացնում, թե ինչ հարուստ է Հայաստանի մշակութային կյանքը, այստեղ բառացիորեն ամեն օր ներկայացումներ են, բեմադրություններ, համերգներ և ցուցահանդեսներ»:

Լրագրողի դիտարկմանը, որ Ղրիմի հանրաքվեի արդյունքում վերականգնվեց Ռուսաստանի պատմական ամբողջականությունը, Ղրիմը կարո՞ղ է Ղարաբաղի համար նախադեպ դառնալ, դեսպանը պատասխանել է.

«Գիտե՞ք, այդ հարցին այնքան էլ հեշտ չէ պատասխան տալ: Երևի թե հարկավոր է դատել այն բանից, որ յուրաքանչյուր ազգ ինքնորոշման իրավունք ունի: Եվ այն հարցին, թե կարո՞ղ է արդյոք տվյալ ազգն ինքնորոշվել և անկախություն ստանալ, կախված է կոնկրետ պատմական հանգամանքներից: Ռուսաստանը Ղրիմը ցանկացած գնով վերադարձնելուն չէր ձգտում, պարզապես այդ պահին այդպես եղավ, իրավիճակից ելնելով, քանի որ Ղրիմի ռուսալեզու բնակչությունը չէր կարող կառավարվել ֆաշիստական տարրեր ունեցող իշխանությունների կողմից»,- նշել է դեսպանը:

Իվան Վոլինկինը հարցազրույցի ընթացքում նաև հայտնել է Ռուստատանի և Հայաստանի փոխհարաբերությունների մասին՝ մասնավորապես նշելով.

«Վստահ եմ, որ Ռուսաստանը պետք է ավելի ակտիվորեն հայտարարի Հայաստանի տեղեկատվական դաշտում իր ներկայության մասին: Այս առումով որևէ կասկած լինել չի կարող: Սակայն, հավանաբար, պետք է նաև այլ մեթոդներով զբաղվել Հայաստանում գործող այն հասարակական կազմակերպությունների չեզոքացմամբ, որոնք ցանկանում են սեպ խրել ռուս-հայկական հարաբերություններում: Ռուսաստանում, օրինակ, օրենք է ընդունվել, որը շատ հստակ կարգավորում է ՀԿ-ների գործունեությունը: Ի վերջո, ակնհայտ է, որ նրանք, ովքեր իրենց գործունեությունն ուղղում են ռուս-հայկական բարեկամության դեմ, Ռուսաստանի ու Հայաստանի բարին չեն ցանկանում»: