ՕԵԿ-ը քառյակի գործունեությունից առանձին գրեթե նույնական նախագիծ է առաջարկել կենսաթոշակայինի հարցով

Չնայած Ազգային ժողովի ոչ իշխանական չորս ուժերն արդեն հայտարարել են, որ կուտակային կենսաթոշակներին վերաբերող օրենքում փոփոխությունների համատեղ նախագիծ են մշակել, սակայն իրեն ընդդիմադիր հայտարարած «Օրինաց երկիրը» չի միացել նրանց: Այս կուսակցությունն առանձին է շրջանառության մեջ դրել օրենքի նախագիծ, որով առաջարկվում է փոփոխություններ կատարել «Կուտակային կենսաթոշակների մասին» օրենքում: Այս մասին մայիսի 8-ին լրագրողների հետ հանդիպմանն ասաց ԱԺ ՕԵԿ խմբակցության պատգամավոր Հովհաննես Մարգարյանը: «Նախագծով մենք առաջարկում ենք հանել պարտադիր բաղադրիչը և կուտակային կենսաթոշակային համակարգին մասնակցությունը դարձնել կամավոր»,- ասաց Մարգարյանը:

Նա նշեց, որ իրենց առաջարկած նախագծի ընդունման դեպքում այն քաղաքացիները, ովքեր կցանկանան կամավորության սկզբունքով մասնակցել կուտակային կենսաթոշակային համակարգին, դիմում կգրեն և կշարունակեն մասնակցել, իսկ նրանք, ովքեր չեն ցանկանա՝ համապատասխան դիմումով կհրաժարվեն, ինչից հետո կկատարվի վերահաշվարկ և նրանց գումարները կվերադարձվեն:

Հարցին, թե ինչով է տարբերվում իրենց նախագիծը «քառյակի» ներկայացրած նախագծից, Հովհաննես Մարգարյանն ընդգծեց, որ տարբերություններ կան, սակայն բովանդակային առումով երկու նախագծերով էլ առաջարկվում է օրենքից հանել պարտադիր բաղադրիչը:

Մարգարյանը նշեց, որ այս պահին իրենք պատրաստում են երկրորդ նախագիծը, որը, իրենց առաջարկած առաջին նախագծի ընդունման դեպքում, իրավական երաշխիքներ կտա քաղաքացիներին, որ նույնիսկ կամավորության սկզբունքով մասնակցելու դեպքում նրանց գումարները չեն կորելու: