Ադրբեջանում վերջնականապես հրաժարվել են Ղարաբաղին ուժով տիրելու մտքից. ադրբեջանագետ

Ադրբեջանում արդեն բոլորը քաջ գիտակցում են, որ Լեռնային Ղարաբաղին ուժով տիրելու տարբերակի իրագործումն անհնարին է, Ադրբեջանը հայտնվեց «հայկական մուրճի ու ռուսական սարի արանքում» ու նրա համար պատերազմի վերսկսումը կնշանակի, որ Շուշիից հետո հայերը հնարավորություն կունենան ազատագրել նաև Բաքուն: «Արմենպրես»-ի հետ զրույցում նման տեսակետ արտահատեց ադրբեջանահայերի ասամբլեայի ղեկավար Գրիգորի Այվազյանը' Շուշիի ազատագրման օրվան ընդառաջ: «Հիմա արդեն Ադրբեջանում վերջնականապես հրաժարվել են մտքից, որ երբևիցե կկարողանան վերատիրել Ղարաբաղին ուժով' կապված Ղրիմում վերջին իրադարձությունների հետ: Հիմա իրենք ավելի շատ մտածում են սեփական անկախությունը պահպանելու մասին: Իրականում, նրանք Ղարաբաղին վերջնականապես հրաժեշտ տվեցին: Եթե սկսեն պատերազմը, այն Ադրբեջանի համար կլինի մահվան դատավճիռ»,-ասաց Գրիգորի Այվազյանը' հավելելով, որ Ղարաբաղյան պատերազմը հայ ժողովրդի համար մեծ հայրենական պատերազմն էր, որտեղ վճռվում էր նրա լինել-չլինելու հարցը, իսկ Շուշիի ճակատամարտը և հաղթանակը հայկական Ստալինգրադն էր, որտեղ ջախջախվեց ադրբեջանական ֆաշիզմի ողնաշարը:

Գրիգորի Այվազյանի խոսքով' Ադրբեջանի ղեկավարությունը, վերադասավորելով իր ուժերը, խաղադրույք է կատարել քարոզչական պատերազմում հաղթանակի հասնելու վրա: «Ադրբեջանը ջանք ու եռանդ չի խնայում' շռայլորեն ֆինանսավորելով հայ ժողովրդի միասնականությունը խաթարող զանազան ծրագրերը: Ադրբեջանահայությունն ադրբեջանական սադրանքներին դիմակայելու լավագույն միջոց է դիտարկում Ղարաբաղի Հանրապետության և նույնիսկ Հայաստանի Հանրապետության մայրաքաղաքը տեղափոխել Շուշի քաղաք, վերականգնել հայ-աղվանից կաթողիկոսությունը Գանձասարում, առանց նախապայմաննե րի տրամադրել կես միլիոնանոց ադրբեջաբահայերին ԼՂ քաղաքացիություն' պահպանելով նրանց փախստականի կարգավիճակը: Այս հարցով մտադիր ենք դիմել ՀՀ և ԼՂՀ աշխարհիկ և հոգևոր իշխանություններին, քանի որ հաղթանակն անհրաժեշտ է պաշտպանել ամեն օր»,-նշեց ադրբեջանագետը:

Անդրադառնալով Ջեյմս Ուորլիքի ներկայացրած խաղաղության վեց կետերին, Գրիգորի Այվազյանը նշեց, որ Ղարաբաղյան հակամարտությունն այն տարբերակով, ինչպես ներկայացրել են, չի կարող լուծվել: «Հայաստանում ոչ մի իշխանություն չի ստորագրի այդպիսի փաստաթուղթ արյան գնով նվաճված հողերի վերաբերյալ, ցանկացած իշխանության համար այն մահվան դատավճիռ կլինի: Մենք պետք է աշխատենք ունեցածն ամրապնդելու և մեր հաղթանակները շատացնելու ուղղությամբ»,-հավելեց ադրբեջանագետը: