ՕԵԿ-ը պատրաստ է համագործակցել քառյակի հետ

Ազգային ժողովի ՕԵԿ խմբակցությունը պատրաստ է համագործակցել ոչ իշխանական քառյակի հետ: Այս մասին մայիսի 8-ին լրագրողների հետ հանդիպմանը տեղեկացրեց ԱԺ ՕԵԿ խմբակցության պատգամավոր Հովհաննես Մարգարյանը՝ պատասխանելով հարցին, թե պատրաստվու՞մ է ՕԵԿ-ը միանալ քառյակին: «Բոլորովին վերջերս, երբ քառյակը հանդիպում էր «Ժառանգություն» խմբակցությունում, հրավիրվել ենք նաև մենք և համատեղ համաձայնության եկել»,- ասաց Մարգարյանը՝ ընդգծելով, որ ՕԵԿ-ը պատրաստ է համագործակցել բոլոր քաղաքական ուժերի հետ:

Պատգամավորի խոսքով` ՕԵԿ-ը նիստին մասնակցելու հրավեր ստացել է «Ժառանգություն» խմբակցության ղեկավար Ռուբեն Հակոբյանից, նիստում որոշ մոտեցումներ են քննարկել և համաձայնության եկել: «Եթե կլինի լավ նախաձեռնություն, ապա ՕԵԿ-ը կաջակցի և կմասնակցի դրան»,- ասաց պատգամավորը:

Քառյակի վերջին նիստում քննարկվել է ԱԺ հաշվիչ հանձնաժողովի ձևավորման հարցը: Քառյակի կողմից առաջարկ է եղել հաշվիչ հանձնաժողովից հետ կանչել ՕԵԿ անդամին, ինչի շուրջ կողմերը համաձայնության են եկել: Նա նշեց, որ եղել են նաև այլ քննարկումներ և առաջարկներ՝ միաժամանակ հույս հայտնելով, որ իրենց կողմից շրջանառության մեջ դրված նախագիծը, որով առաջարկվում է հանել կուտակային կենսաթոշակների պարտադիր բաղադրիչը, կարժանանա քառյակի աջակցությանը:

Մարգարյանը նաև նշեց, որ առաջիկայում իրենք հանդես են գալու մի քանի տասնյակ նոր նախագծերով, որոնք վերաբերելու են երկրի առջև ծառացած սոցիալական խնդիրների լուծմանը և կբխեն հասարակության շահերից: Այս պահին մշակվում է վարչական իրավախախտումների մասին օրենքում փոփոխությունների նախագիծ, որով առաջարկվելու է նվազեցնել ճանապարհաին երթևեկության խախտումների համար տուգանքի չափերը: «Կարգ խախտող վարորդները պետք է տուգանվեն, սակայն տուգանքի չափը շատ մեծ է, հատկապես հոծ գիծը խախտելու և արագությունը մի փոքր գերազանցելու համար սահմանված տուգանքի չափը անհամաչափ է և պետք է փոփոխության ենթարկվի»,- ասաց պատգամավորը: