Կալիֆորնիայի խորհրդարանը ընդունել է Արցախի անկախությունը ճանաչող պատմական բանաձև

ԱՄՆ Կալիֆորնիա նահանգի խորհրդարանը մայիսի 8-ին ձայների ջախջախիչ մեծամասնությամբ ընդունել Է Արցախի Հանրապետության անկախությունը ճանաչող պատմական բանաձև:

ՀՅԴ Արևմտյան Ամերիկյայի կենտրոնական կոմիտեն ողջունել է այդ խիզախ և հիմնարար քայլը և նշել, որ դա ամերիկահայության, ինչպես նաև Կալիֆորնիայի քաղաքացիական հասարակության տքնաջան աշխատանքի արդյունք է:

«Այդ քվեարկությունը մեծապես կամրապնդի հայ ժողովրդի ոգին' իր արդար տենչանքները հետապնդելու ճանապարհին, ինչպես նաև կշեշտի Լեռնային Ղարաբաղի ժողովրդի սեփական ճակատագրին տեր լինելու, ժողովրդավարական ինքնակառավարման համակարգ ստեղծելու ու այդ ճանապարհով իր գոյությանն սպառնացող վտանգաներին դիմագրավելու պայքարի կարևորությունը:

Առավել գնահատելի է այն, որ Կալիֆորնիայի օրենսդիր մարմինն ազատության և ինքնորաշաման սկզբունքներն ամրապնդող իր այս քաջ քայլն արեց' ի հեճուկս ադրբեջանական ուժեղ ճնշումների»,- ասված է ՀՅԴ Արևմտյան Ամերիկյայի կենտրոնական կոմիտեի հայտարարության մեջ:

ՀՅԴ Արևմտյան Ամերիկյայի կենտրոնական կոմիտեն առանձնակի շնորհակալություն է հայտնել խորհրդարանի անդամներ Մայք Կաթոյին, Աթրին Նազարյանին, Քաջո Աշաճյանին և խորհրդարանի նախագահ Ջոն Փերեզին, ովքեր ղեկավարել են այս դրական արդյունքին հասնելու աշխատանքները:

Նշվում է նաև, որ այս բանաձևի որդեգրումը վճռական հաղթանակ է ողջ հայ ժողովրդի, Արցախի բնակչության և ինքնորոշման պայքար տանող բոլոր ժողովուրդների համար:

Կալիֆորնիայի և Միացյալ Նահանգների խոշորագույն քաղաքներից Լոս Անջելեսի քաղաքային խորհուրդը 2014 թվականի սկզբին Լեռնային Ղարաբաղը ճանաչեց որպես անկախ և ինքնիշխան պետություն: Իսկ 2013-ի աշնանը Ղարաբաղի անկախությունը ճանաչեց նույն նահանգի Հայլենդ քաղաքը: Լեռնային Ղարաբաղի անկախությունը ճանաչող բանաձևեր են ընդունել ամերիկյան Ռոդ Այլենդ, Մեյն, Լուիզիանա նահանգները: