«Հրապարակ». Խորհրդարանական ոչ իշխանական չորս ուժերը հակված են չմասնակցել կառավարության ծրագրի քվեարկությանը

Խորհրդարանական ոչ իշխանական չորս ուժերը հակված են չմասնակցել կառավարության ծրագրի քվեարկությանը: Հրաշալի կոչվող քառյակը քննարկում է միասնական բոյկոտի տարբերակը: ԲՀԿ-ն, ի տարբերություն Գալուստ Սահակյանի քվեարկության, հաստատ «ազատ չի թողնի» կուսակիցներին, որովհետեւ խնդիր ունեն վերագտնել Գրիգորիչի քվեարկության ժամանակ իրենց կորցրած վարկանիշը: Ինչ վերաբերում է քառյակի մյուս ուժերի դիրքորոշմանը, Հայ ազգային կոնգրեսը հակված է մերժել այս կառավարությանն առհասարակ, բայց թե ինչ եղանակով՝ դեմ քվեարկելով, թե բոյկոտելով՝ դեռ որոշում են: Կոնգրեսում տրամադրությունները «դեմ»-ի կողմն են, բայց հանուն «ընկերովի մահի» եւ ԲՀԿ-ին հերթական անգամ պատմության մեջ չգցելու համար պատրաստ են նաեւ միասնական բոյկոտի գնալ:

Դաշնակցությունից ասացին՝ դիրքորոշում կհայտնեն։ «Ժառանգության» երկու հոգանոց խմբակցության համար ոչ տաք է, ոչ սառը. եթե միասնականություն լինի, չեն ընդդիմանա, եթե ոչ՝ կնայեն իրավիճակին: «Բոյկո՞տ, թե՞ դեմ դիրքորոշում արտահայտելն է ճիշտ»,- երեկ հարցրինք «Ազատ դեմոկրատներ» կուսակցության ղեկավար, ԱԺ պատգամավոր Խաչատուր Քոքոբելյանին։ «Բոյկոտը որպես քաղաքական գործիք իմաստ է ունենում այն դեպքում, որ ցանկացած նախագիծ այդ բոյկոտի դեպքում կարող է տապալվել, բայց ընդհանրապես բոյկոտն էլ քաղաքական որոշում է, երբ քվեարկության վրա ազդեցություն չես կարող ունենալ»: Քոքոբելյանը նույնպես դիրքորոշում կհայտնի, երբ ուսումնասիրի ծրագիրը, իսկ այն ԱԺ կներկայացվի մայիսի 19-ին մեկնարկող հերթական քառօրյայում:

Ի դեպ, կառավարության ծրագրի քվեարկությունից հետո կառավարությանը մի փորձություն էլ է սպասվում. հունիսին կառավարության հաշվետվությունը պետք է ներկայացվի ԱԺ-ին, եւ ԱԺ-ն կատարված աշխատանքներին պետք է հավանություն տա: Ըստ էության, Հովիկ Աբրահամյանը պետք է հաշվետու լինի Տիգրան Սարգսյանի կառավարության աշխատանքների համար, այն կառավարության, որի ոտի տակը փորելով՝ ինքն ու իր մերձավորները գրավեցին գործադիրը: Բնական է, որ նա շատ կուզենար բացասական արտահայտվել, այսինքն՝ այնպես, ինչպես իրականում մտածում է այդ կառավարության եւ նրա գործունեության մասին, սակայն այդ դեպքում ԱԺ-ն անվստահություն կհայտնի, եւ հաշվետվություն ներկայացնող կառավարությունը պետք է հրաժարական տա: Ուստի ստիպված պետք է լինի դրական արտահայտվել եւ դրական վերաբերմունք խնդրել խորհրդարանից: Ամեն դեպքում՝ հետաքրքիր իրավիճակ է ստեղծվել:

Շարունակությունը` «Հրապարակ» օրաթերթի այսօրվա համարում: