«Հրապարակ». «Մեզ մնացել է միայն մեկ օգնության ձեռք՝ ռուսական ձեռքը»

Իզուր է անհանգստանում Ռուսաստանի դեսպանը՝ ոչ միայն հայաստանյան հասարակական կազմակերպությունները, այլեւ մեր պետությունն էլ այսուհետ Եվրոպայից ու ԱՄՆ-ից օգնություն դժվար թե ստանա: 

Մենք մտել ենք մի այնպիսի փուլ, որ մեզ մնացել է միայն մեկ օգնության ձեռք՝ ռուսական ձեռքը: Այնպես որ, ռուսական կողմի կանխատեսած վտանգների «չեզոքացումը» ստացվելու է ինքնիրեն: Այնպես, ինչպես ստացվեց Ղրիմի հարցում մեր անվերապահ աջակցությունը, որի մասին երեկ եւս մեկ անգամ, արդեն Մոսկվայում, խոսեց երկրի առաջին դեմքը՝ ռուսական կայսրության ղեկավարի հետ հանդիպման ժամանակ: «Հայաստանը հստակ հայտարարել է, որ Ղրիմում հանրաքվեի անցկացումը մեր ընկալմամբ համարվում է ազատ կամարտահայտության միջոցով ժողովուրդների ինքնորոշման իրավունքի իրագործման եւս մեկ օրինակ»,- ասել է Սերժ Սարգսյանը:

Լավ է գոնե հնչեցրել է նաեւ երկրորդ միտքը. «Այդուհանդերձ, մենք չափազանց մտահոգված ենք Ուկրաինայում բռնությունների աճով, այդ թվում՝ Օդեսայի, Սլավյանսկի, Կրամատորսկի եւ այլ շրջանների իրադարձությունների կապակցությամբ: Մեզ չի կարող չանհանգստացնել ստեղծված իրավիճակը, այդ թվում նաեւ այն պատճառով, որ այնտեղ ավելի քան կես միլիոն հայեր են բնակվում»: Բայց առաջին նախադասությունն ասելուց հետո էլ ի՞նչ անհանգստության մասին կարող է խոսք լինել: Մանավանդ եթե մեր համայնքի անվտանգության եւ կեցության հարցերը լուծողը Ուկրաինայում դեսպան նշանակված Անդրանիկ Մանուկյանն է: Մեկը, ով ավելի շատ մտահոգ է գեղանկարների իր կոլեկցիան բազմացնելով եւ իր բիզնեսը զարգացնելով, քան հայ-ուկրաինական հարաբերություններով:

Շարունակությունը` «Հրապարակ» օրաթերթի այսօրվա համարում: