Հայաստանում 1450 վետերան է ապրում

Հայրենական Մեծ պատերազմի մասնակից Հայաստանում բնակվող ամենաերիտասարդ վետերանը 88 տարեկան է, իսկ ամենատարեցի տարիքն անցնում է 100-ը: Հայաստանում վետերանների թիվն ապրիլի 1-ի դրությամբ 1450 է: Հաղթանակի 65-ամյակը մենք տոնում էինք 3500 վետերանների հետ: Համաձայն վիճակագրության' ամեն ամիս կյանքից հեռանում է 30-45 վետերան: 2014-ին կյանքից հեռացել է 400 վետերան: Երևանում Հայրենական մեծ պատերազմի մասնակիցների թիվն ամենաշատն է' 565, իսկ մարզերից' Լոռիում, ուր նրանց թիվը հասնում է 128-ի, Գեղարքունիքում' 116, Շիրակում' 115, Կոտայքում 104, Տավուշում 105, Սյունիքում 97, Արարատում 85, Արմավիրում 65, Արագածոտնի մարզում' 42 և Վայոց ձորում 28:

Հայաստանում գործում է վետերանական 50 կազմակերպություն, որոնցից 11-ը' Երևանում: Հայրենական պատերազմին, պաշտոնական տվյալներով, մասնակցել են 600 հազար հայեր ոչ միայն Խորհրդային Հայաստանից, այլև' Սփյուռքից, ԱՊՀ տարբեր երկրներից, որոնցից 200-250 հազարն ընկել են հերոսի մահով։

Հայրենական Մեծ պատերազմի վետերան Ժորա Թունյանը ծնվել է 1925 թվականին նա 452-րդ առանձին զենիթ-հրանոթային դիվիզիայի, ապա 1860 առանձին հրետանային գնդի, ավագ լեյտենանտն է: Մասնակցել է Ռովնո, Լուցկ, Դուբնո, Լվով, Պերեմշլ, Տարնոբժեկ Սանդոմիր քաղաքների ազատագրմանը: «Արմենպրես»-ի հետ զրույցում Ժորա Թունյանը նշեց, որ պատերազմը դառնություն, վիշտ ու ցավ է պատճառել: «Այսօր մենք պատրաստվում ենք Հաղթանակի զբոսայգում մասնակցել տոնական միջոցառման, բայց ցավոք, ոչ բոլոր վետերանները կարող են մասնակցել, որով հետև բոլորն էլ առողջական խնդիրներ ունեն, այսօր քայլող վետերան տեսնելը հազվադեպ բան է»,- անկեղծացավ Արաբկիր համայնքի պատերազմի, աշխատանքի, ԶՈւ և իրավապահ մարմինների վետերանների խորհրդի նախագահը, ով նաև Երևանի Արաբկիր վարչական շրջանի պատվավոր քաղաքացի է: Նրա գնահատմամբ' պետության կողմից վետերանների սոցիալական վիճակը բարելավելու համար որոշ քայլեր արվում են, սակայն դա բավարար չէ: