Վլադիմիր Գասպարյանն արձագանքել է Գագիկ Ծառուկյանի հայտարարությանը

ՀՀ ոստիկանապետ Վլադիմիր Գասպարյանը դատարկ խոսակցություններ է որակում իր և նորանշանակ վարչապետ Հովիկ Աբրահամյանի միջև լարված հարաբերությունների վերաբերյալ լուրերը: Երևանի «Հաղթանակ» զբոսայգում պատասխանելով լրագրողների հարցին' Գասպարյանը նշեց, որ շուրջ 30 տարի է՝ ինքն ու Հովիկ Աբրահամյանը միմյանց ճանաչում են: Իր հնարավոր պաշտոնանկության վերաբերյալ լուրերին Վլադիմիր Գասպարյանն այսպես պատասխանեց. «Ես նման եմ մարդու, որը պաշտոնի համար մտավախություններ կարո՞ղ է ունենալ: Ես պաշտոնանկ եմ անում, չեմ պաշտոնանկվում»:

Գասպարյանի խոսքով' Հովիկ Աբրահամյանի և Գագիկ Ծառաուկյանի հետ իր հարաբերությունները երբևիցե վատ չեն եղել և շարունակում են այդպես էլ մնալ: «Դուք տեսե՞լ եք՝ Գագիկ Ծառուկյանի մասին վատ բան ասեմ: Ինձ համար նշանակություն չունի՝ ԲՀԿ-ական է, ՀՀԿ-ական, հնչակ, դաշնակ, սոցիալ-դեմոկրատ, ինչ նշանակություն ունի, մենք գնում ենք երևույթների, այլ ոչ թե կուսակցությունների հետևից»,- ասաց նա:

Գագիկ Ծառուկյանի այն հայտարարությունը, թե հաջորդ ընտրություններում հաղթանակը կշրջանցի Մելիք Ադամյան փողոցը, Վլադիմիր Գասպարյանն այսպես մեկնաբանեց. «Երևի այնտեղ գծանշաններ պետք է անեն այդ օրը, կապված, թե ինչ կողմով կգնան, երևի դա է նկատի ունեցել»: Իսկ ՀՀԿ խոսնակ Էդուարդ Շարմազանովի այն հայտարարությանը, թե դեպի հաջորդ իշխանություն տանող ճանապարհն անցնելու է Մելիք Ադմայան փողոցով, Վլադիմիր Գասպարյանը պատասխանեց. «Դե գծանշանները կբացվեն, ներկարարությունը կավարտվի, կանցնեն Մելիք Ադամյանով»: Ոստիկանապետի խոսքով ' մեր ժողովրդին համախմբվածություն է պետք:

Անդրադառնալով այն մեկնաբանություններին, որ Ռոբերտ Քոչարյանի կադրերը վերադարձել են կառավարություն, Վլադիմիր Գասպարյանն ասաց. «Այս երկրում, կարծում եմ, որ լավ աշխատողը պետք է տեղ ունենա և աշխատի: Իմն ու քոնը պետք է չլինի, պետք է լինի լավ աշխատող և վատ աշխատող, պարկեշտ մարդ և անբարեխղիճ մարդ, բանսարկու և բանսարկության դեմ կռիվ անող մարդ»:

Ոստիկանապետն անդրադարձավ նաև վարչապետ Հովիկ Աբրահամյանի երեկվա հայտարարությանը՝ ուղղված կառավարության անդամներին, որ իր հանձնարարությունը չկատարող պաշտանյաները կհեռացվեն աշխատանքից. «Իհարկե, լավ չաշխատողից պետք է բաժանվել ու հրաժարվել, ի՞նչ սպառնալիքներ, ես նման եմ մարդու, որ սպառնալիքներ… Ես չաշխատո՞ղ եմ: Ինձնից շատ երևի միայն տրակտորն է աշխատում, նա մետաղից է և դիմանում է»: