Ուորլիքի նպատակը խաղաղության համաձայնագրի կետերի վերաբերյալ քննարկում սկսելն է. Ջոն Հեֆերն

ԵԱՀԿ Մինսկի խմբի ամերիկացի համանախագահ Ջեյմս Ոուորլիքի նպատակը նոր քաղաքականության մասին հայտարարելը չէր, այլ խաղաղության համաձայնագրի կետերի վերաբերյալ քննարկում սկսելը, որպեսզի ժողովուրդները պատրաստ լինեն: Այս մասին «Հաղթանակ» զբոսայգում լրագրողների հետ զրույցում նշեց ՀՀ-ում ԱՄՆ արտակարգ և լիազոր դեսպան Ջոն Հոֆերնը: «Պարոն Ուորլիքի ելույթում նորից ամրագրվում էին այն սկզբունքները, որոնք արծարծվել էին տարիների ընթացքում՝ Մինսկի խմբի գործընթացի շրջանակում»,- ասաց դեսպանը:

Ըստ Հեֆերնի՝ ամերիկացի համանախագահը գտնում է, որ օգտակար կլինի, որպեսզի մեկ անգամ ևս կրկնվեն այն սկզբունքները, որոնք Մինսկի խմբի փաստաթղթերում հիշատակվել են, որպեսզի Հայաստանում ու Ադրբեջանում նորից թարմացվի դա, և քննարկում ընթանա: Խոսելով բանակացային գործընթացում Լեռնային Ղարաբաղը ներգրավելու հարցի մասին՝ ԱՄՆ դեսպանն ասաց. «Պարոն Ուորլիքը հստակ նշել է, որ բոլոր կողմերի դիրքորոշումները գործըթնացի համար էական են: Կոնկրետ մասնակցությունը պետք է կողմերի միջև բանակցվի, կողքից ոչ ոք չի կարող պարտադրել դա»:

Խաղաղության Քարնեգի միջազգային հիմնադրամում ԵԱՀԿ Մինսկի խմբի ԱՄՆ-ի համանախագահ Ջեյմս Ուորլիքը ներկայացրել է ԼՂ հակամարտության կարգավորման համաձայնագրի վեց կետերի իր տեսլականը: Առաջին կետով ամերիկացի համանախագահը կարևորել է Լեռնային Ղարաբաղի ինքնորոշման իրավունքի ճանաչումը. «Հաշվի առնելով Լեռնային Ղարաբաղի բարդ պատմությունը՝ կողմերը պետք է համաձայնության գան, որ վերջնական իրավական կարգավիճակի որոշումը պետք է իրականացվի փոխադարձաբար համաձայնեցված և իրավական ուժ ունեցող կամարտահայտման միջոցով, ապագայում: Սա ընտրովի տարբերակ չէ: Միջանկյալ կարգավիճակը կլինի ժամանակավոր»: Երկրորդ, ըստ Ուորլիքի, նախկին Լեռնային Ղարաբաղի Ինքնավար մարզի սահմաններում գտնվող տարածքը, որը չի վերահսկվում Բաքվի կողմից, պետք է ստանա միջանկյալ կարգավիճակ, որի համար առնվազն պետք է ապահովված լինեն անվտանգության երաշխիքներ և ինքնակառավարում: Երրորդ կետով ամերիկացի համանախագահը կարևորել է Ադրբեջանի ինքնիշխանության նկատմամբ հարգանքի դրսևորումը, առանց որի կարգավորում չի կարող լինել, իսկ չորրորդով' ամրագրել Հայաստանը Լեռնային Ղարաբաղի հետ կապող ցամաքային անվտանգ միջանցքի կարևորությունը: Ամերիկացի համանախագահի նշած հինգերորդ կետը ներքին տեղահանվածների ու փախստականների իրենց նախկին բնակավայր վերադառնալու իրավունքի ամրագրումն է: «Եվ, վերջապես, վեցերորդ, կարգավորմամբ պետք է ապահովվեն անվտանգության միջազգային երաշխիքներ, ինչը կներառի խաղաղապահ գործողություն: Չկա այնպիսի սցենար, որտեղ խաղաղությունն ապահովվի առանց լավ մշակված ու բոլոր կողմերի վստահությունը վայելող խաղաղապահ գործողության»,- ամփոփել է Ուորլիքը: