Վոլինկինը պարզաբանում է իր աղմկահարույց հայտարարությունը

Հայաստանում Ռուսաստանի դեսպան Իվան Վոլինկինը կարծում է, որ իր հայտարարությունն առաջին հերթին վատ ընդունեցին ոչ թե Հայաստանում ընդհանրապես, այլ առանձին խմբեր: «Հաղթանակ» զբոսայգում լրագրողների հետ զրույցում Վոլինկինը նշեց, որ ոչ ոքի կոչ չի անում գնալ Հայաստանից, այլ կոչ է անում լինել հնարավորինս արդար բոլոր հարցերում: «Ես իմ խոսքերը հետ չեմ վերցնում երբեք: Հարցը հետևյալն է՝ իմ ցանկացած խոսք կարող է մեկնաբանվել` ինչպես հարմար է: Ես եկել եմ այստեղ, որպեսզի ամրապնդվեն ու ընլայնվեն մեր երկրների հարաբերությունները՝ փոխադարձ հարգանի ու սիրո մթնոլորտում: Իսկ թե ինչպես են մեկնաբանում իմ քայլերը, դա թող մնա իրենց խղճին»,- ասաց ՌԴ դեսպանը:

Հայաստանում Ռուսաստանի դեսպան Իվան Վոլինկինը Մոսկվայում լույս տեսնող հայկական «Ноев Ковчег» ռուսալեզու պարբերականին տված հարցազրույցում ասել էր․ «Վստահ եմ, որ Ռուսաստանը պետք է ավելի ակտիվորեն հայտարարի Հայաստանի տեղեկատվական դաշտում իր ներկայության մասին: Այս առումով որևէ կասկած չկա: Սակայն հավանաբար պետք է նաև այլ մեթոդներով զբաղվել Հայաստանում գործող այն հասարակական կազմակերպությունների չեզոքացմամբ, որոնք ցանկանում են սեպ խրել ռուս-հայկական հարաբերություններում:

Ռուսաստանում, օրինակ, օրենք է ընդունվել, որը շատ հստակ կարգավորում է ՀԿ-ների գործունեությունը: Ի վերջո, ակնհայտ է, որ նրանք, ովքեր իրենց գործունեությունն ուղղում են ռուս-հայկական բարեկամության դեմ, Ռուսաստանի ու Հայաստանի բարին չեն ցանկանում»:

Արտաքին գործերի նախարարության մամուլի խոսնակ Տիգրան Բալայանը' պատասխանելով հարցին, թե ինչպե՞ս է մեկնաբանում Ռուսաստանի դեսպանի հայտարարությունը հայ-ռուսական հարաբերություններում «սեպ խրող» հասարակական կազմակերպությունների մասին, ասել է. «Չեմ կարծում, որ որևիցե հասարակական կազմակերպություն ի զորու է սեպ խրել Հայաստանի և Ռուսաստանի միջև՝ երկու ժողովուրդների դարավոր բարեկամության վրա հիմնված և ժամանակի փորձությունն անցած, դաշնակցային հարաբերություններում: Հայաստանում բոլոր կազմակերպությունները գրանցվում և գործում են ՀՀ օրենսդրության շրջանակներում»,- հավելել է նա։