Շուշիի ազատագրումը լոկ ճակատամարտ չէր կամ հերթական հաղթանակ, այլ վճռական բեկում էր. հայ արիներ

Հայ Արիական Միաբանությունը, Հայ Ազգայնականների Համախմբումը և «Արցախի ազատամարտի մասնակիցների» խորհուրդն ուղերձ են հղել Շուշիի ազատագրման 22-ամյակի կապակցությամբ: «Բազմիցս ենք նշել, որ մայիսյան տոները, լինելով ազատագրական, պաշտպանական, թե բարոյահոգեբանական, միևնույնն է հաղթանակներ են, որ տվյալ ժամանակահատվածներում կերտել են գոյատևման ուղի՝ հարատևման տեսանելի հեռանկարով: Այդ հաղթանակներն արժեքավոր են յուրովի և հիշատակության արժանի են բոլորը: Շուշին ազատագրելով՝ փառահեղ նախնյաց և մեր պահանջատիրության ու բնական հայրենիքի վերատիրման վեհ կարոտն առանք»,- նշված է ուղերձում:

Երկու կառույցների գնահատմամբ' Շուշիի ազատագրումը լոկ ճակատամարտ չէր կամ հերթական հաղթանակ, վճռական բեկում էր և՛ արցախյան պատերազմում, և՛ աշխարհասփյուռ հայության սրտերում: Այդ հաղթանակը նաև աննկարագրելի խուճապի սկիզբն էր թշնամու ռազմական ու քաղաքական ճամբարներում, որը պիտի ավարտվեր զինադադարի կնքման խնդրագրով:

«Ի վերջո՝ աշխարհի առջև հայի հաղթական ու զորեղ բազկի վերահաստատումն էր դա նաև: Ավարայրի ճակատամարտն իր ժամանակաշրջանի խնդրականն էր լուծում և մարտ էր հանուն կրոնի, բայց նաև սրբազան նահատակության, որ հաղթանակի զորություն ստացավ: Սարդարապատը հանուն ինքնապաշտպանության ու գոյատևման կռիվ էր, որը կերտեց հայոց պետականության վերականգնման առանցքը և 1918թ. մայիսի 28-ին ձևավորվեց հայոց պետությունը՝ հայության հարյուրամյակներ պետականազուրկ գոյատևումից հետո»,- շարունակում են ուղերձի հեղինակները' շնորհավորելով մայիսյան հաղթական տոները, մայիսյան եռատոնը, փառաբանելով (հայ արիական քրմական ծեսով) բոլոր ժամանակների մեր բոլոր նահատակներին, հերոսներին ու մասնակիցներին, նաև թիկունքը ամուր պահողներին, հայաստանյան և սփյուռքյան կառույցների անունից՝ Հայ Արիական Միաբանությունը, ինչպես նաև Հայ Ազգայնականների Համախմբումը՝ մայիսի 8-ի Շուշիի ազատագրության տոնին զուգահեռ նշում են նաև 2-րդ աշխարհամարտի մասնակից հայ զինվորների հաղթանակի օրը՝ մայիսի 9-ին: Նրանց խոսքով' այդ հաղթանակը 1940-ականներին անպաշտպան մնացած հայությանն ազատեց նոր ցեղասպանությունից, որը ծրագրված էր թուրքերի կողմից՝ իրենց դաշնակից գերմանացիների հաղթանակի դեպքում:

Շնորհավորում ենք նաև Երկրապահի տոնը, բոլոր հայ ազատամարտիկներին ու կամավորականներին: Հայ արիականներն ու ազգայնականներն այցելեցին Եռաբլուր և փառաբանեցին ազգի բոլոր նահատակներին, միաժամանակ զորացում, կամք ու բարիք մաղթելով ապրող քաջերի»,- եզրափակված է ուղերձում:

Հայ Արիական Միաբանության գրասենյակում կայացել է նաև Արցախի պատերազմի մասնակիցների հավաք: