«Առավոտ». Քիմ Քարդաշյանը Ֆրանսիայի նախագահին առաջարկել է մեկ միլիոն դոլար

Վաղը չէ մյուս օրը Ֆրանսուա Օլանդը ժամանելու է Երեան: Ինչ-որ զարմանալի նմանություններ կան ներկայիս Ֆրանսիայի եւ Հայաստանի միջեւ: 

Երկու երկրում էլ ժողովրդի մի զգալի մասը խիստ դժգոհ է իշխանություններից, երկու երկրում էլ չի ապահովվել խոստացված տնտեսական աճը, երկու երկրում էլ կառավարությունը շաբաթներ առաջ հրաժարական է տվել: Պարզապես Հայաստանում ընդդիմությունը միայն սպառնացել էր զանգվածային բողոքներ կազմակերպել, իսկ Ֆրանսիայի ընդդիմությունը ուղղակի հաղթանակ էր տարել տեղական ընտրություններում, ինչը եւ կառավարության փոփոխության պատճառ դարձավ: Գրում է «Առովոտ»-ը:

Ու էլի նմանություններ կան, բայց նախ՝ Ֆրանսուա Օլանդին առաջարկված «հայկական»միլիոնի մասին:

Խոսքը, իհարկե, կաշառքի մասին չէ: Մայիսի 24-ին Փարիզում սպասվում է ՙհամաշխարհային իրադարձություն՚՝ Քիմ Քարդաշյանը պաշտոնապես ամուսնանում է իր զուգընկեր Քանյե Ուեսթի հետ: Եվ ըստ արեւմտյան լրատվամիջոցների՝ զույգը Ֆրանսուա Օլանդին է առաջարկել մեկ միլիոն դոլար, որպեսզի նախագահը թույլ տա իր այսպես կոչված Հանրապետական գվարդիան օգտագործել հարսանիքին ժամանող բազմաթիվ հայտնի հյուրերի անվտանգությունն ապահովելու համար:

Հանրապետական գվարդիան, որն ունի 3200 անդամ, սովորաբար ապահովում է Ֆրանսիայի ղեկավարների եւ նրանց բարձրաստիճան հյուրերի՝ տարբեր երկրների նախագահների, վարչապետների եւ այլ պետական այրերի անվտանգությունը:

Քիմ Քարդաշյանը եւ Քանյե Ուեսթը, որոշ տեղեկություններով, ավելի հեռուն են գնացել՝ առաջարկել են իրենց ամուսնության օրը ընդհանրապես փակել Փարիզի օդային տարածքը: Այս անգամ խոսքը անվտանգության մասին չէ: Պարզապես զույգը մտավախություն ունի, որ պապառացիները ուղղաթիռներ կվարձեն եւ վերեւից կնկարահանեն հարսանեկան արարողությունը, այնինչ դրա իրավունքը ֆանտաստիկ գներով արդեն վաճառված է որոշակի ընկերությունների:

Փաստն այն է, որ Փարիզի օդային տարածքը փակելու համաձայնությանը մեկնաբանները խիստ կասկածում են, իսկ Հանրապետական գվարդիան օգտագործելու առաջարկի վերաբերյալ նախագահականից առայժմ արձագանք չկա:

Շարունակությունը` «Առավոտ» օրաթերթի այսօրվա համարում: