Ուորլիքի հայտարարության նպատակն է տարածաշրջանում ուժեղացնել ամերիկյան ներկայությունը. քաղաքագետ

ԵԱՀԿ Մինսկի խմբի ԱՄՆ համանախագահ Ջեյմս Ուորլիքի' Խաղաղության Քարնեգի միջազգային հիմնադրամում ԼՂ հակամարտության կարգավորման վերաբերյալ ելույթն ու Խաղաղության համաձայնագրի նրա առաջարկած վեց կետերը մեծ հաշվով առնչություն չունեն ԼՂ հակամարտության հետ: Դրանք ընդամենը նպատակ են հետապնդում տարածաշրջանում ուժեղացել ամերիկյան ներկայությունը: Քաղաքագետ Հրանտ Մելիք-Շահնազարյանի գնահատմամբ` Ուորլիքի հայտարարությանը հիմնականում նպաստել են Ուկրաինայում և Մերձավոր արևելքում տեղի ունեցող իրադարձությունները, ինչի հետևանքով Հարավային Կովկասում ամերիկյան ներկայության ապահովումը դարձել է խիստ անհրաժեշտ:

Հրանտ Մելիք Շահնազարյանը համաձայնվեց, որ Ուորլիքի առաջարկած համաձայնագրի կետերը մեծ հաշվով նորություն չեն և որոշ չափով խմբագրված Մադրիդյան սկզբունքներն են: Նրա խոսքով` համաձայնագրի նախագծի ներկայացումն այն «ստարտ»-ն է, որով տարածաշրջանում սկսվելու են տարբեր գործողություններ: Ըստ Շահնազարյանի` վեց կետերը որևէ կերպ չեն նպաստում հակամարտության կարգավորմանը, քանի որ հակասում են միմյանց: «Հենց այդ հակասող կետերի պատճառով է, որ արդեն 20 տարի է հակամարտության կարգավորման գործում առաջընթաց չկա»:

Անդրադառնալով ՀՀ Արտաքին գործերի նախարար Էդվարդ Նալբանդյանի հայտարարությանը, քաղաքագետն այն որակեց զգուշավոր անհամաձայնություն' հավելելով, որ հայկական կողմն Ուորլիքի առաջարկած համաձայնագրին ընդհանուր առմամբ կողմ է, դետալներին' ոչ:

Նրա գնահատմամբ` թեպետ համաձայնագրի կնքումը չի հանգեցնի պատերազմի վերսկսման, սակայն լարվածությունն էապես կաճի: Դրան նաև նպաստում է արտաքին գործոնը, որը մեր տարածաշրջանում շատ մեծ է, իրադարձություններն էլ զարգանում են անկանխատեսելի արագությամբ: