«Արի տուն» ծրագրով այս տարի հայրենիք կայցելի 1000 երեխա

Երևանի քաղաքապետ Տարոն Մարգարյանն ու ՀՀ սփյուռքի նախարար Հրանուշ Հակոբյանը Երևանի քաղաքապետարանի աշխատակազմի հետ հանդիպման ժամանակ քննարկել են «Արի տուն» ծրագրի հետ կապված հարցեր: «Երևանի քաղաքապետարանը 6-րդ տարին է, ինչ իր ակտիվ մասնակցությունն է ունենում «Արի տուն» ծրագրին : Եվ քանի որ ծրագիրը տարեցտարի ընդլայնվում և մասնակիցների թիվն աճում է, մենք պատարստ ենք ձեռնարկելու համապատասխան քայլեր՝ Երևանում ավելի մեծ թվով սփյուռքահայ երեխաներ հյուրընկալելու համար: Քաղաքապետարանի լիազորությունների շրջանակում մշտապես պատրաստակամ ենք աջակցելու նախարարության ծրագրերին և խորացնելու առկա համագործակցությունը»,- ընդգծել է Տարոն Մարգարյանն ու պատասխանատուներին տեղում հանձնարարել նախապատրաստական աշխատանքներ տանել ծրագրի՝ քաղաքապետարանի մասով պատշաճ կազմակերպման և իրականացման ուղղությամբ:

Շնորհակալություն հայտնելով քաղաքապետ Տարոն Մարգարյանին ծրագրի շրջանակում ցուցաբերվող աջակցության համար՝ Հրանուշ Հակոբյանը կարևորել է նաև վարչական շրջանների և պատասխանատու մյուս ստորաբաժանումների դերը երեխաների հյուրընկալության հարցում: «Անցած 5 տարիների ընթացքում մենք ավելի քան հինգ հազար սփյուռքահայ երեխա ենք ընդունել, ինչի արդյունքում հիսուն հազար հայեր բարեկամացել են միմյանց հետ: Այս տարի նախատեսվում է, որ հայրենիք կայցելի 1000 երեխա: Շատերը, գալով Երևան, պարզապես սիրահարվում են մայրաքաղաքին և իրենց ապագան տեսնում այստեղ: Ամեն օր հանդիպելով սփյուռքից ժամանած մեր տասնյակ հայրենակիցների՝ մշտապես լսում եմ նրանց արձագանքը այն դրական փոփոխությունների վերաբերյալ, որոնք կատարվում են մայրաքաղաքում, ինչի համար շնորհակալություն եմ հայտնում Ձեզ, պարոն քաղաքապետ»,- նշել է Հրանուշ Հակոբյանը:

Ծրագրի իրականացման նպատակով կձևավորվի համատեղ աշխատանքային խումբ: Երևանի քաղաքապետ Տարոն Մարգարյանն ու Սփյուռքի նախարար Հրանուշ Հակոբյանը քննարկել են նաև «Իմ Հայաստան» խորագրով մշակութային փառատոնի, ինչպես նաև սեպտեմբերին Երևանում «Հայաստան-Սփյուռք» 5-րդ համաժողովի անցկացման հետ կապված հարցեր: