Շավարշ Քոչարյանն անդրադարձել է ԵԱՀԿ Մինսկի խմբի համանախագահների հայտարարությանը

Մադրիդյան փաստաթուղթը Հայաստանը և Ադրբեջանն ընդունել են որպես հիմք Լեռնային Ղարաբաղի հակամարտության խաղաղ կարգավորման բանակցությունների համար, այլ ոչ թե ընդունել են բոլոր այն սկզբունքները, որոնք այնտեղ նշված են: Այս մասին Ազգային ժողովում լրագրողների հետ զրույցում ասաց ՀՀ արտաքին գործերի փոխնախարար Շավարշ Քոչարյանը՝ անդրադառնալով ԵԱՀԿ Մինսկի խմբի համանախագահների հայտարարությանը՝ հրադադարի հաստատման 20-ամյակի կապակցությամբ: «Որպեսզի այդ բանակցություններում լինի առաջընթաց, անհրաժեշտ է համապատասխան մոտեցում բոլոր կողմերից: Տվյալ պարագայում Ադրբեջանի դիրքորոշումը թույլ չի տալիս առաջընթաց բանակցություններում»,- ասաց Քոչարյանը:

Հարցին, թե արդյոք մտահոգիչ չէ՞ այդ հայտարարության մեջ «Լեռնային Ղարաբաղի հարակից շրջանները շարունակում են օկուպացված մնալ» ձևակերպման ու ԼՂ «ստատուս քվոյի» վերաբերյալ դրույթների առկայությունը, Քոչարյանն ասաց, որ հենց դրանք երկու ամենասուր կետերն են, որոնց շուրջ ակնհայտ է, որ կա անհամաձայնություն, ինչն էլ մատնանշում են համանախագահները: «Այդ երկուսի շուրջ կա անհամաձայնություն և ըստ համանախագահների' դա առաջընթացի հնարավորություն չի տվել»,- ասաց Քոչարյանը:

Իսկ հարցին, թե պատրաստվո՞ւմ է Հայաստանը հրաժարվել Մինսկի խմբի ձևաչափից, Քոչարյանն ընդգծեց, որ ակնհայտ է, որ ԵԱՀԿ ՄԽ ձևաչափից ցանկանում է հրաժարվել Ադրբեջանը, այն պարզ պատճառով, որ այդ ձևաչափը զսպաշապիկ է, ոչ միայն մասնագիտացված է, այլ շատ լավ գիտի հակամարտության նախապատմությունը: «Այս ձևաչափում ընգրկված են ՄԱԿ-ի անվտանգության խորհրդի մշտական անդամ երեք պետություններ' Ռուսաստան, ԱՄՆ, Ֆրանսիա և բոլոր հայտարարությունները հստակ ասում են մեկ բանի մասին' խաղաղ կարգավորում: Հայտարարություններից մեկում, որը միանշանակ հասցեագրված էր Ադրբեջանին ասվել է, որ այլ հետևանքներ, որոնք այսօր կան' մարդկային զոհեր, ավերածություններ և այլն, ուժային կարգավորման արդյունք են և նոր ուժի կիրառումը կբերի նոր ավերածությունների ու զրկանքների: Հետևաբար, այդ ձևաչափն ունի երկու առաքելություն' նպաստելու, որ կողմերը կարողանան հասնել փոխզիջումների վրա համաձայնության և թույլ չտալ, որ այն փխրուն զինադադարը, որի 20-ամյակն է և որի կապակցությամբ էլ համանախագահները հայտարարություն են արել ընդհատվի և վերածվի ռազմական գործողությունների»,- նշեց ԱԳ փոխնախարարը:

Նա նկատեց, որ միանշանակ է, թե ով է ձգտում ազատվել այդ ձևաչափից՝ հիշեցնելով Ադրբեջանի բազմաթիվ հայտարարությունները, որոնք վկայում են այն մասին, որ այդ պետությունը մեկ ՌԴ-ից է դժգոհ, մեկ Ֆրանսիայից, մեկ էլ ԱՄՆ-ից կամ անընդհատ բարձրաձայնում են ձևաչափի ֆորմատը փոխելու, նոր անդամներ ավելացնելու և այլնի մասին: