Ֆրանսուա Օլանդը ժամանեց Հայաստան

Ֆրանսիայի Հանրապետության նախագահ Ֆրանսուա Օլանդի օդանավը վայրէջք է կատարել Երևանի «Զվարթնոց» օդանավակայանում: Նրան դիմավորել է ՀՀ նախագահ Սերժ Սարգսյանը: Տեղի ունեցավ դիմավորման արարողություն' այցելության ամենաբարձր մակարդակի' պետական այցի արարողակարգի համաձայն:

Ծրագրվում է, որ մայիսի 12-13-ը պետական այցով Հայաստանում գտնվող Օլանդը կբացի Հայ-ֆրանսիական գործարար ֆորումը և կայցելի Հայաստանում Կարֆուրի ապագա խանութի համար նախատեսված տարածք: Նախագահը կբացի Միսաք Մանուշյանի անվան պուրակը՝ ի հիշատակ Դիմադրության շարժման ֆրանսահայ նշանավոր ներկայացուցչի և դեսպանությունում կընդունի Հայաստանի ֆրանսիական համայնքին:

Նախագահ Ֆրանսուա Օլանդը 2013թ. հոկտեմբերին Փարիզում ընդունել էր ՀՀ Նախագահ Սերժ Սարգսյանին: Երկօրյա այցն էլ ավելի կամրապնդի Հայաստանը և Ֆրանսիան միավորող բարեկամական կապերը: Քանի որ այցը նպատակ ունի ավելի բարձր մակարդակի վրա դնելու երկու երկրների միջև գոյություն ունեցող տնտեսական և առևտրական հարաբերությունները, նախագահը Հայաստան է ժամանում գործարար առաջնորդների մի մեծ պատվիրակության ուղեկցությամբ, ովքեր կմասնակցեն հայ-ֆրանսիական տնտեսական ֆորումին:

Հայաստանի Հանրապետության և Ֆրանսիայի Հանրապետության միջև դիվանագիտական հարաբերությունները հաստատվել են 1992թ. փետրվարի 24-ին: Երկու երկրների իրավապայմանագրային դաշտը կազմում են 23 փաստաթղթեր' համաձայնագրեր, արձանագրություններ, հուշագրեր: