Սերժ Սարգսյանը բարձր է գնահատում 2015թ. Հայոց ցեղասպանության զոհերի հիշատակը Հայաստանում հարգելու Ֆրանսուա Օլանդի ցանկությունը

Արտաքին Քաղաքական 13 Մայիս, 2014 12:41

Հայաստանը շնորհակալ է Ֆրանսիային Հայոց ցեղասպանությունը ոչ միայն օրենքի ուժով ճանաչելու և դատապարտելու, այլ նաև ժխտողականության դեմ իրավական մեխանիզմներով պայքարելու հանձնառության համար: Այս մասին հայտարարեց ՀՀ նախագահ Սերժ Սարգսյանը Ֆրանսիայի նախագահ Ֆրանսուա Օլանդի հետ համատեղ ասուլիսում: «Այս հարցն ավելի քան արդիական է' հատկապես Հայոց ցեղասպանության 100-ամյա տարելիցին ընդառաջ' ժխտողականությունը համաեվրոպական դաշտ տեղափոխելու‚ և դա խոսքի ազատության լոզունգներով խեղելու Թուրքիայի ջանադիր փորձերի համատեքստում: Մենք պետք է զգոն և աչալուրջ լինենք, քանի որ անպատժելիությունն ամենաթողություն է ծնում, մանավանդ որ ժամանակակից աշխարհը նույնպես զերծ չէ մարդկության դեմ կատարվող ամենադաժան հանցագործություններից»,-հայտատարեց ՀՀ նախագահը:

Նա նշեց, որ մտադիր էր Ֆրանսուա Օլանդի այցի ընթացքում նրան հրավիրել Հայաստան 2015 թվականին ներկա գտնվելու Հայոց ցեղասպանության 100-րդ տարելիցի միջացառումներին: «Կարող եք պատկերացնել, թե որքան բարձր է գնահատվել, երբ Դուք ինքներդ այդ մասին հայտարարեցիք ապրիլի 24-ին Փարիզում Հայոց ցեղասպանության 99-րդ տարելիցին նվիրված Ձեր ելույթում: Մենք Ձեր այդ քայլը ընդունում ենք' որպես ամենախոսուն վկայություն հայ ժողովրդի և Հայաստանի հանդեպ Ձեր լիակատար նվիրվածության ու բարեկամության: Շնորհակալություն մեկ անգամ ևս պարոն Նախագահ Ձեր այդ արարքի համար: Սիրելի ընկերներ, համոզված եմ, որ նախագահ Օլանդի այցը մեծ ներուժ է հաղորդելու հայ-ֆրանսիական քաղաքական երկխոսությանն ու բազմակողմ համագործակությանը»,- ասաց ՀՀ նախագահը:

2001թ. Ֆրանսիան ճանաչել է Հայոց ցեղասպանությունը: 2011 թ-ի դեկտեմբերի 23-ին Ֆրանսիայի ազգային ժողովն ընդունել է պատգամավոր Վալերի Բուայեի հեղինակած Հայոց ցեղսպանության ժխտումը քերականացնող օրինագիծը, որով նախատեսվում էր այն ժխտողների համար սահմանել 45 հազար եվրո տուգանք և նվազագույնը մեկ տարվա ազատազրկում: Սակայն Ֆրանսիայի սահմանադրական խորհուրդն օրինագիծը չեղյալ է հայտարարել' հիմնավորելով, որ այն հակասում է Սահմանադրությանը: Բուայեն հետևողական է նոր օրինագծի անցկացման հարցում և իր երկրի նախագահին մի քանի անգամ կոչ է արել քաղաքական կամք դրսևորել և ընդունել օրինագիծը: