Վերահրատարակված շտեմարաններից մինչև խլացուցիչ սարքեր. ԳԹԿ-ն պատրաստ է ընդունել այս տարվա դիմորդներին

2013-2014 թթ. ուսումնական տարվա շրջանավարտներին նորացված, վրիպակներն ուղղված և վերահրատարակված են ներկայանալու քննական շտեմարանները: Մայիսի 13-ին հրավիրված ասուլիսում ՀՀ Գնահատման և թեստավորման կենտրոնի Գագիկ Մելիքյանը նշեց, որ ոչ պակաս, քան կես տարի առաջ դիմորդը պետք է տեղեկանա, թե հաջորդ տարվա քննություններին ինչ փոփոխություններ են կատարվել: Հաշվի առնելով այս հանգամանքը' 2013 թվականի նոյեմբեր-դեկտեմբերին ԳԹԿ-ն տպագրել և անվճար բաշխել է առարկաների ուղեցույցերը, որտեղ հստակեցվում են եկող տարվա թեստերի կառուցվածքը և փոփոխությունները:

«Նախորդ տարի շտեմարանների մուտքը բերեց բարձր միավորների առատություն: Դա պայմանավորված էր նրանով, որ շտեմարանները մտան գործածության մեջ, և առաջադրանքների թիվը բավականին քիչ էր»,- ասաց ԳԹԿ տնօրենը:

Նա հայտնեց, որ այս տարվա հիմնական նպատակը, ցուցումն այն է, որ թեստերի շեմի հաղթահարումը հեշտ լինի 7.5 միավորը հավաքելու համար, և պետք է բավականաչափ դժվար լինի 18-20 միավոր հավաքելու համար:

«Երբ 18-20 հավաքող դիմորդների կուտակումներ են գոյանում, բավականաչափ դժվար է լինում անվճար տեղերի մրցույթ անցկացնելը»,- բացատրեց բանախոսը' հավելելով, որ իրենց ցանկությունն է, որպեսզի միավորները միջին բաշխվածություն ունենան, և քննությունից կտրվող դիմորդների թիվը նույնպես մեծ չլինի:

Նա շեշտեց, որ այն, թե թեստերն իբր բարդ են, միայն սիրողական մակադակի խոսակցություններ են:

Պատասխանելով այն հարցին, թե արդյոք բարդ հարցերը խճողված չե՞ն լինի' Մելիքյանը նշեց, որ իրենք բոլոր քայլերը ձեռնարկել են շտեմարաններից երկիմաստ հարցերը հանելու ուղղությամբ:

«Եթե անցած տարվա թեստերը նայեք, բոլորը նշում են, որ վերահրատարակված շտեմարանների մակարդակը շատ ավելի բարձր է»,- ասաց ԳԹԿ տնօրենը:

Նա նաև տեղեկացրեց, որ իրենք բազմիցս նշել են, որ պետությունը որևէ գումար չի հատկացնում շտեմարանների հրատարակության համար, դրանք տպագրում են գրահրատարակիչները ինքնածախսածածկման սկզբունքով: Եվ որպեսզի շտամարանների բոլոր հատորները հասանելի լինեն անգամ սոցիալապես անապահով դիմորդներին, դրանք տեղակայված են ԳԹԿ կայքում, և ցանկացած ոք կարող է օգտվել այդտեղից:

Միասնական քննությունների հայտագրման առաջին փուլն այս տարվա շրջանավարտների համար ավարտված է: Երկրորդ փուլում կդիմեն դիմորդներ հայաստանյան ուսումնարաններից, քոլեջներներից, օտարերկրյա պետություններից, ինչպես նաև զորացրվածները:

Այս տարի դիմորդների թիվը` 12 հազար 346, 2013 թվականի համեմատ պակասել է 1500-ով: Մելիքյանն այս միտումը բացատրում է նաև նրանով, որ տարեցտարի մեծանում է քոլեջներ գնացող շրջանավարտների թիվը, և ՀՀ կրթության և գիտության նախարարությունը համապատասխան ծրագրեր է իրականացնում միջին մասնագիտական կրթության ոլորտում:

«Ծնողները գտնում են, որ ավելի լավ է երեխան արհեստի տիրապետի, քան բուհում սովորի, հետո դիպլոմը դնի գրպանը»,- նկատեց փորձագետը:

Նա փաստեց, որ դիմորդների թվի նվազման միտումը պայմանավորված է նաև նրանով, որ տարեցտարի ավելանում է հոսքը ոչ Հայաստանի Հանրապետության բուհեր' Ամերիկյան, Սլավոնական, Ֆրանսիական համալսարաններ, ինչը պետք է հրավիրի նախարարության ուշադրությունը հայաստանյան բուհերի կրթության որակն էապես բարձրացնելու վրա:

Դիմորդների թվի քանակով առաջատար է «Հայոց լեզու և գրականություն» առարկան, որին կմասնակցեն 7577 շրջանավարտ: Հաջորդիվ «Մաթեմատիկան» է և օտար լեզուները:

Հայաստանում արդեն առանձացվել և կահավորման փուլում են գտնվում քննական 34 կենտրոն, որոնցից 10-ը Երևանում են, 24-ը' մարզերում:

ԳԹԿ-ն քայլեր է ձեռնարկում նաև խլացուցիչ սարքերի տեղադրման ուղղությամբ, որպեսի քննական տարածքում բացառվի հեռախոսակապի առկայությունը:

«Գնալով ավելի դժվարէ դառնում քննական կենտրոնում հեռախոսակապը ճնշելը, լինում են դեպքեր, երբ դիմորդն իր հետ քննության է բերում երեք հեռախոս»,- պատմեց Մելիքյանը:

Նա ծնողներին կոչ արեց ավելի ուշադիր լինել, չխախտել հավասարության սկզբունքը: Ականջակալների կամ այլ տեսակի սարքերի օգտագործումից չխուսափելու դեպքում դիմորդներն անմիջապես կհեռացվեն քննություններից' հատկապես հաշվի առնելով այն հանգամանքը, որ տարեցտարի հեշտանում է բուհ ընդունվելու հնարավորությունը: