Հայաստանի համար ասոցացման առանձնակի առաջարկությունը ցանկալի է. Սերժ Սարգսյան

Հայաստանը Ռուսաստանի հետ ունի երկկողմ բարեկամության պայմանագիր, երկու երկրները գտնվում են անվտանգության միևնույն համակարգում, իսկ ժողովուրդների միջև բարեկամությունը ձգվում է մի քանի հարյուրամյակ և հենց այդ հիմքի վրա է, որ Հայաստանը որոշում է կայացրել անդամակցել Մաքսային միությանը: Նախագահ Սերժ Սարգսյանի գնահատմամբ` հաշվի առնելով հայ ռուսական դարավոր բարեկամությունը, տնտեսական և էներգետիկ ոլորտում համագործակցությունը, որևէ մեկի համար չպետք է զարմանալի լիներ Մաքսային միությանն անդամակցելու մեր երկրի որոշումը:

«Տնտեսական, մշակութային ամուր և փոխկապակցված դարավոր հարաբերություններ: Սա է այսօրվա մեր հարաբերությունների հիմքը: Կարծում եմ' որևէ մեկի համար տարօրինակ չէր Հայաստանի ցանկությունն անդամակցել Մաքսային միությանը, որովհետև, իրոք, տնտեսական փոխկապակցվածությունն այսօր շատ բարձր մակարդակի վրա է»,- մայիսի 13-ին Երևանում Ֆրանսիայի նախագահի հետ համատեղ ասուլիսի ժամանակ ասաց Սերժ Սարգսյանը' ի պատասխան ֆրանսիացի լրագրողի հարցին, թե ինչպե՞ս կբացատրի Մաքսային միությանն անդամակցելու դիրքորոշումը:

Նախագահի խոսքով' Մաքսային միությունը որոշակի առավելություններ է տալիս անդամ երկրներին: «Օրինակ, Հայաստանին հնարավորություն է տրվում ներկրել մրցունակ գներով էներգակիրներ, ինչը թույլ է տալիս մեր սահմանափակ հնարավորությունների սահմաններում ունենալ մրցունակ ապրանքներ: Սա է մեր որոշման ելակետը, շարժառիթը»,- ասաց նախագահը' միաժամանակ հավելելով, որ Մաքսային միության անդամակցությունը չի նշանակում, որ Հայաստանը դադարեցնում է ԵՄ-ի հետ հարաբերությունները:

«Ցանկալի կլինի, որ ասոցացման առանձնակի առաջարկություն լինի Հայաստանի համար: Այնպես որ, մենք շարունակում ենք Եվրամիության հետ մեր հարաբերությունների խորացումը, որովհետև այդ հարաբերությունները ոչ միայն հնարավորություն են' վերադառնալու մեր արմատներին, այլ նաև արագ բարեփոխումներ իրականացնելու մեր երկրում»,- նշեց Սերժ Սարգսյանը:

2013թ. սեպտեմբերի 3-ին ՀՀ նախագահ Սերժ Սարգսյանը Մոսկվայում ներկայացրեց Հայաստանի ցանկությունը միանալ Մաքսային միությանը: Այդ հայտարարությունից հետո կողմերի միջև սկսվել է անդամակցությանն ուղղված հսկայական աշխատանք, կազմվել է ինտեգրման ճանապարհային քարտեզ ու ամենայն հավանականությամբ մայիսի վերջին Հայաստանը կանդամակցի Մաքսային միությանը: Միաժամանակ, Հայաստանը հայտարարել է, որ Մաքսային միությանն անդամակցությունը որևէ կերպ չի խոչընդոտի Հայաստանի ինտեգրմանը դեպի Եվրամիություն և Հայաստանը պատրաստ է շարունակել համագործակցությունը ԵՄ-ի հետ այն հարցերի ու ոլորտների շուրջ, որոնք չեն խոչընդոտի Մաքսային միությանը հետ անդամակցությանը: