Հերմինե Նաղդալյանը հանդիպել է ԵԽ Երևանի գրասենյակի ղեկավարի հետ

ՀՀ ԱԺ փոխնախագահ, ԵԽԽՎ-ում ՀՀ ԱԺ պատվիրակության ղեկավար Հերմինե Նաղդալյանը մայիսի 13-ին հանդիպել է Եվրոպայի խորհրդի Երևանի գրասենյակի ղեկավար Օլեքսանդր Պավլյուկի հետ: Օլեքսանդր Պավլյուկը շնորհավորել է տիկին Նաղդալյանին ԵԽԽՎ հայաստանյան պատվիրակության ղեկավար նշանակվելու առթիվ՝ մաղթելով հաջողություններ և արդյունավետ գործունեություն: Նա նշել է, որ դրական է գնահատում ԵԽ նախարարների կոմիտեում Հայաստանի նախագահությունը: Նրա խոսքով' Եվրոպայի խորհրդի երևանյան գրասենյակի նպատակն է շարունակել աջակցել Հայաստանում ժողովրդավարության զարգացմանն ուղղված ծրագրերի իրականացմանը:

Տիկին Նաղդալյանը նշել է, որ Հայաստանը եվրոպական արժեհամակարգի կրողն է, և կարևորել է ԵԽ երևանյան գրասենյակի դերը և կատարած աշխատանքը մեր երկրում: Նա ողջունել և կարևորել է ժողովրդավարության խորացման, արդարադատության համակարգի բարեփոխումների, տեղական ինքնակառավարման մարմինների գործունեության հետ կապված ծրագրերը: Հերմինե Նաղդալյանն անդրադարձել է տարածաշրջանային զարգացումներին և ղարաբաղյան հիմնախնդրին: ԵԽ նախարարների կոմիտեում Ադրբեջանի առաջիկա նախագահությանն անդրադառնալով՝ նա մտահոգություն է հայտնել հայ-ադրբեջանական սահմանը հատած և գերի ընկած մարդկանց մասին: Տիկին Նաղդալյանը հույս է հայտնել, որ ԵԽ կնպաստի գերիների արտահանձման հարցի լուծմանը: