«Առաջին» ալիքի եթերով 2013թ. հեռարձակվել են 8,733.9 ժամ ընդհանուր ծավալով հեռուստահաղորդումներ

Հայաստան 14 Մայիս, 2014 15:34

Արտակ Դավթյանի նախագահությամբ մայիսի 14-ին տեղի է ունեցել ԱԺ գիտության, կրթության, մշակույթի, երիտասարդության և սպորտի հարցերի մշտական հանձնաժողովի նիստը: Երկրորդ ընթերցմամբ քննարկվել է «Գովազդի մասին» ՀՀ օրենքում փոփոխություններ և լրացումներ կատարելու մասին» օրենքի նախագիծը: Հիմնական զեկուցող Սամվել Ֆարմանյանը ներկայացրել է պատգամավորների առաջարկությունները, որոնք ընդունվել են օրինագծի հեղինակների կողմից:

Հանձնաժողովը դրական եզրակցություն է տվել օրինագծին:

Հանրային հեռուստառադիոընկերության 2013թ. գործունեության վերաբերյալ հաղորդումը ներկայացրել է Հանրային հեռուստառադիոընկերության խորհրդի նախագահ Ռուբեն Ջաղինյանը: 2013 թվականին «Հայաստանի հանրային հեռուստաընկերություն» ՓԲ ընկերությունը շարունակել է հեռուստահաղորդումների արտադրության և հեռարձակման իր առաքելությունը, պատրաստել և օրական 24 ժամ հեռարձակել է հեռուստահաղորդումներ «Առաջին» և արբանյակային ալիքներով: 2013 թվականի ընթացքում Հանրային հեռուստաընկերությունը օրենսդրությամբ իրեն վերապահված լիազորությունների շրջանակներում և սահմանված պահանջներին համապատասխան պատրաստել և հեռարձակել է թեմատիկ տարբեր ուղղություններով հաղորդումներ' նպատակ ունենալով առավելագույնս բավարարել հանրության տարբեր շերտերի և սոցիալական խմբերի հեռուստատեսային պահանջմունքները և ապահովել տեղեկացված լինելու նրանց սահմանադրական իրավունքը:

2013թ. ընթացքում «Առաջին» ալիքի եթերով հեռարձակվել են 8,733.9 ժամ, իսկ արբանյակային ալիքի եթերով՝ 8,733.7 ժամ ընդհանուր ծավալներով հեռուստահաղորդումներ:

Հանրային հեռուստառադիոընկերության 2013թ. գործունեության վերաբերյալ հաղորդումը հանձնաժողովի կողմից ընդունվել է ի գիտություն, այնուհետև Ռուբեն Ջաղինյանը պատասխանել է պատգամավորների հարցերին և լսել նրանց մտահոգություններն ու առաջարկությունները Հանրային հեռուստաընկերության գործունեության վերաբերյալ: