Քեսաբից գերեվարված հայերը Թուրքիայի Վաքըֆից կտեղափոխվեն Բեյրութ

Սիրիայի հայաշատ Քեսաբի վրա հարձակումից հետո բռնությամբ Թուրքիայի Վաքըֆ գյուղ տեղափոխված հայերը մայիսի 15-ին Բեյրութ կտեղափոխվեն: Այս մասին տեղեկացրեց ՀՀ սփյուռքի նախարար Հրանուշ Հակոբյանը: «Մենք աշխատում էինք այս ուղղությամբ Կարմիր Խաչի միջազգային կոմիտեի, Լիբանանի և Սիրիայի մեր հայակական կազմակերպությունների հետ: Բանն այն է, որ 22 հոգուն ավելացան ևս 5-ը, նրանք ցանկություն են հայտնել վերամիավորվել իրենց ընտանքիներին հետ, ընտանիքները Հայաստանում չեն, այդ պատճառով նրան պետք է հասնեն կամ Բեյրութ կամ Լաթաքիա: Մեր տեղեկություններով` քանի որ նրանք փասաթղթեր չունեն, այս օրերին փաստաթղթավորվել են, որ կարողանան տեղաշարժվել, վաղը` մայիսի 15-ին, նրանք պետք է անցնեն Բեյրութ»,-ասաց նախարարը:

Նախարարությունն ավելի վաղ դիմել էր Կարմիր խաչի միջազգային կոմիտեի հայաստանյան պատվիրակությանը, նրան հանձնել այն բոլոր քեսաբահայերի ցուցակը, ովքեր գտնվում են Թուրքիայում, և խնդրել օգնել, որպեսզի քեսաբահայերը միավորվեն իրենց ընտանիքների հետ: