Դատարանը Պիստորիուսին ուղարկել է հոգեբուժական փորձաքննության

Հարավաֆրիկյան Հանրապետության Պրետորիա քաղաքի դատարանը հանրաճանաչ պարաօլիմպիական Օսկար Պիստորիուսին, որը մեղադրվում է իր ընկերուհու կանխամտածված սպանության մեջ, ուղարկել է հոգեբուժական փորձաքննության:

Պաշտպանության վկան՝ բժիշկ Մերիլ Ֆորսթերը, հայտնել է, որ Պիստորիուսը, հնարավոր է՝ տառապում է տագնապ առաջացնող նևրոզից, ինչն սպանության գիշերը կարող էր ազդել նրա վիճակի վրա, երբ նա գնդակահարել է իր ընկերուհուն՝ մոդել Ռևա Սթենքամփին:

Սովորաբար հոգեբուժական փորձաքննության ընթացակարգը տևում է շուրջ 30 օր:

Հաջորդ դատական նիստը տեղի կունենա մայիսի 20-ին: Մինչ այդ մեղադրող կողմը և պաշտպանությունը պետք է որոշեն, թե հատկապես որտեղ է հետազոտությունն անցնելու Պիստորիուսը:

Թեթևատլետն իր ընկերուհուն գնդակահարել է 2013 թվականի փետրվարին: Պաշտպանությունը պնդում է, որ մարզիկը Սթենքամփին սպանել է չկանխամտածված՝ նրան կողոպտիչի տեղ դնելով, հաղորդել է «Ինտերֆաքս» գործակալությունը