Էկոնոմիկայի նախարարը և գործարարները վարչապետի հետ հանդիպումից հետո տնտեսական մեծ զարգացումներ են ակնկալում

Հայաստանի վարչապետ Հովիկ Աբրահամյանի և խոշոր գործարարների հանդիպման ժամանակ քննարկվել են տնտեսության զարգացման ծրագրերը, որպեսզի խոշոր արտադրողները և սպառողները տեղյակ լինեն կառավարության հետագա ծրագրերից: Այդ մասին հանդիպումից հետո լրագրողների հետ զրույցում նշեց ՀՀ էկոնոմիկայի նախարար Կարեն Ճշմարիտյանը: Խոսելով ներդրումների իրականացման երաշխիքների մասին՝ նախարարը նշեց, որ դրանք գալիս են աշխատանքով, ծրագրերով, հետևողականությամբ, կոնկրետ ներդրումային ծրագրերին աջակցելով, ճիշտ շարժառիթներ ստեղծելով: «Էական չէ' այդ ներդրումը 100 միլիոն դոլար է, թե 100 հազար դրամ: Այնուամենայնիվ, պետք է շարժառիթ լինի, հատկապես՝ բիզնեսի համար: Եթե շարժառիթ չկա, ապա ներդրումներ չեն լինի: Իսկ շարժառիթը ներդրումային լավագույն միջավայրն ու պայմաններն են, որոնք կան և որոնք կառավարությունն իր իրավասությունների շրջանակներում կարող է տրամադրել»,- ասաց Ճշմարիտյանը: Նրա խոսքով՝ սա է հանդիպման ընդհանուր գաղափարախոսությունը:

Գործարար Բարսեղ Բեգլարյանը նշեց, որ ջերմ մթնոլորտում անցած հանդիպման ժամանակ փորձ է արվել ելքեր գտնել՝ երկրի տնտեսությունը զարգացնելու համար: Հարցին՝ նորություններ կլինե՞ն տնտեսական դաշտում՝ Բեգլարյանը նշեց. «Շատ, անպայման, ես վստահ եմ, որ վարչապետի նախաձեռնությունները կյանքի են կոչվելու և բիզնես դաշտը մեծ զարգացում է ապրելու»:

Ազգային ժողովի «Հանրապետական» խմբակցության պատգամավոր, գործարար Աշոտ Աղաբաբյանի խոսքով՝ քննարկվել է արտահանման կշռի բարձրացման հարցը: Հարցին՝ ինչ երաշխիքներ է տվել վարչապետը՝ Աղաբաբյանն ասացա. «Շատ մեծ: Ասաց, որ գործարարների կողքը պետք է կանգնի և ամեն ինչ լինելու է արդարության սկզբունքներով»: