«Հրապարակ». Լավը և վատը արագությամբ հայտնի են դառնում բոլորին

Փոքր երկրում ապրելը բազում բացասական, նույնքան էլ դրական հետեւանքներ ունի: Բացասականների թվում թերեւս այն բազում թելերն են, որով մենք կապված ենք միմյանց, եւ որով բոլորս դառնում ենք խոցելի, կառավարելի ու կախյալ: Դրա հետեւանքով է նաեւ, որ մեզանում հաճախ ոչ թե մարդու մասնագիտական որակներն ու հմտություններն են գնահատվում, եւ մարդը ոչ թե սեփական աշխատանքի ու աշխատասիրության շնորհիվ է առաջ գնում, այլ խնամի-բարեկամ-ծանոթ կապերի: Բայց փոքր երկրի դրական դրսեւորումներից է մասնավորապես այն, որ մեզանում ոչինչ հնարավոր չէ գաղտնի պահել. եւ լավը, եւ վատը արագությամբ հայտնի են դառնում բոլորին: Նոր կառավարության կազմավորումից հետո տարածվող լուրերը՝ այս կառավարության անդամների նշանակմանը «նպաստող» հանգամանքների մասին, անշուշտ, կրիմինալի ոլորտից են եւ հրապարակման ոչ ենթակա:

Ոչ մեկը, անգամ ամենադեղին մամուլն իրեն թույլ չի տա հրապարակել այն լուրերը, որոնք հիմա շրջանառվում են ամենուրեք՝ այս կամ այն անձի վճարած միլիոնավոր դոլարների, ձեռք բերած պայմանավորվածությունների մասին: Բայց սա փոքր երկիր է, եւ եթե այդ մասին գիտեն 1, 2, 10 հոգի, այն վաղ թե ուշ դառնալու է հանրության սեփականությունը: Եթե անգամ տեղ չի գտնելու մամուլում, բանավոր խոսքուզրույցի մակարդակով տարածվելու է եւ հասնելու յուրաքանչյուր քաղաքացուն: Եվ կարեւորն այն չէ, որ այդ ինֆորմացիան չի արտացոլվի տպագիր կամ էլեկտրոնային լրատվամիջոցներում, կարեւորն այն է, թե շարքային մարդիկ ինչ հետեւություն են անելու այդ խոսակցություններից: Հերթական հիասթափությունների, իշխանության նկատմամբ հավատի վերջին նշույլները կորցնելու, արտագաղթի հերթական ալիքի, պաշտոնյաների հանդեպ ահագնացող զզվանքի տեսքով: Եվ մի՞թե սա չի անհանգստացնում իշխողներին:

Շարունակությունը` «Հրապարակ» օրաթերթի այսօրվա համարում: