ԼՂ հակամարտության լուծումը պետք է բխի կողմերի շահերից և ընդունելի լինի բոլորին. Զդիսլավ Ռաչինսկի

Անկախ սահմանային լարվածությունից և երբեմն կրկնվող զինված գործողություններից տարածաշրջանում իրավիճակն ընդհանուր առմամբ անվտանգ է, իսկ հայ-ադրբեջանական սահմանին խաղաղություն է: «Արմենպրես»-ի հետ զրույցում թեկուզև փխրուն, բայց խաղաղությունը Հայաստանում Լեհաստանի դեսպան Զդիսլավ Ռաչինսկին անվանում է լուրջ ձեռքբերում' հավելելով, որը անհրաժեշտ է ամրացնել այդ խաղաղությունը և աջակցել խնդրի վերջնական կարգավորմանը: Ռաչինսկին շեշտում է, որ Եվրամիությունը սատարում է ԵԱՀԿ Մինսկի խմբի գործունեությունն ու համանախագահների աշխատանքը, որոնք այդ անչությամբ շարունակում են ջանքեր գործադրել:

Անդրադառնալով խնդրի կարգավորմանը, դեսպանը հավելում է, որ անհրաժեշտ է փոխհամաձայնացված բանաձև, որը ընդունելի կլինի կողմերին և կնպաստի երկարաժամկետ խաղաղության հաստատմանը: «Անկախ հանգամանքից, թե առաջիկայում զարգացումներն ինչպիսի ընթացք կստանան, Հայաստանն ու Ադրբեջանը կշարունակեն մնալ հարևաններ և անհրաժեշտ է նորմալացնել հարաբերությունները և ընդունել փոխհամաձայնեցված մի որոշում, որը կբխի կողմերի շահերից և ընդունելի կլինի բոլորին»,- ընդգծեց դեսպանը:

Անդրադառնալով ԵԱՀԿ ՄԽ ԱՄՆ համանախագահ Ջեյմս Ուորլիքի հայտարարությանն ու խաղաղության վեց կետերին, Ռաչինսկին շեշտում է, որ դրանք ընդհանրական կետեր են և ներկայացնում էին ԵԱՀԿ ՄԽ երեք պետությունների ղեկավարների հայտարարությունները:

«Այդ կետերը որոկապես նոր մտքեր և առաջարկություններ չեն պարունակում: Ուորլիքի հայտարարությունն ու վեց կետերը ընդամենը ներկայացնում են մի հիմք, որի վրա կարելի է շարունակել բանակցություններն ու երկխոսությունը հանուն խաղաղության հաստատման»,- ասաց Ռաչինսկին:

Նա գնահատմամբ, յուրաքանչյուր հակամարտություն ունի երկու կողմ և յուրաքանչյուրն ունի իր հիմնավորումներն ու առաջարկությունները: «Միջնորդների նպատակն էլ այնպիսի բանաձևի ստեղծումն է, որտեղ կողմերը կլինեն գոհ: Խաղաղությունը չի կարելի ստիպել: Դա պետք է կողմերի ցանկությունը լինի, դա պետք է լինի նաև երկու հասարակությունների ցանկությունը, որպեսզի նրանք ընկալեն, որ խաղաղության հաստատումն առաջին հերթին բարեկեցություն կբերի կողմերին»,- ասաց Ռաչինսկին:

Խաղաղության Քարնեգի միջազգային հիմնադրամում ԵԱՀԿ Մինսկի խմբի ԱՄՆ-ի համանախագահ Ջեյմս Ուորլիքը ներկայացրել է ԼՂ հակամարտության կարգավորման համաձայնագրի վեց կետերի իր տեսլականը: Դրան հաջորդել է համանախագահների համատեղ հայտարարությունը հրադադարի հաստատման 20-ամյակի առիթով: