Սալվադոր Դալիի մշտական գրանցումը Երևանում

Հայաստանի ազգային պատկերասրահը կհարստանա իսպանացի գեղանկարիչ և քանդակագործ Սալվադոր Դալիի գրաֆիկական ստեղծագործություններով: Այս մասին «Արմենպրես»-ի թղթակցի հետ զրույցում նշեց պատկերասրահի տնօրեն Փարավոն Միրզոյանը: Մայիսի 18-ին' Թանգարանների միջազգային օրը պատկերասրահում տեղի կունենա Քրիստին Արժիլեի կողմից ՀԱՊ-ին ընծայվող Սալվադոր Դալիի գրաֆիկական ստեղծագործությունների ցուցահանդեսը և նվիրատվության արարողությունը, որին ներկա կլինի ՀՀ մշակույթի նախարար Հասմիկ Պողոսյանը։

ՀԱՊ տնօրենի խոսքով` բացի Դալիի գործերից, պատկերասրահի հավաքածուում իրենց արժանի տեղը կգտնեն նաև Վասիլի Կանդինսկու և Հանս Բելմերի աշխատանքները:

«ՀԱՊ-ին ընծայվում են Սալվադոր Դալիի' համաշխարհային փառք վայելող նկարչի ստեղծագործությունները: Դրանք շատ կարևոր եմ համարում. թեկուզ գրաֆիկական ստեղծագործություններ են, սակայն Դալիի գործերն են: Պատկերասրահը շատ արժեքավոր նվեր է ստանում»,- նշեց Փարավոն Միրզոյանը:

ՀԱՊ տնօրենը հիշեցրեց, որ 2011թվականին պատկերասրահում բացվել էր ցուցահանդես, որին ներկայացվել էին Սալվադոր Դալիի, Հանս Բելմերի, Լեոնոր Ֆինիի, Վասիլի Կանդինսկու և այլ հեղինակների գրաֆիկական աշխատանքներ, որոնք կրկին Հայաստան էին բերվել ԱՄՆ-ի «Արժիլե պատկերասրահի» տնօրեն հայտնի նկարիչ Ժան Կազանջյանի կին Քրիստին Արժիլեի հավաքածուից:

«Մոտ 15 ստեղծագործություն կնվիրվեն պատկերասրահին: ՀԱՊ-ում Դալիի և Բելմերի աշխատանքներից չկան, սակայն ունենք Կանդինսկու գործերից»,-հավելեց Փարավոն Միրզոյանը: