«Հայաստանում բոլոր գործարարները պետք է աշխատեն հավասար դաշտում». Հովիկ Աբրահամյան

Կառավարությունը որդեգրել է խաղի նոր կանոններ. Հայաստանում բոլոր գործարարները պետք է աշխատեն հավասար պայմաններում: Այս մասին ՀՀԿ գործադիր մարմնի նիստից առաջ, լրագրողների հետ զրույցում նշեց ՀՀ վարչապետ Հովիկ Աբրահամյանը՝ ընդգծելով, որ սկսելու է հենց իրենից: «Ես ցանկանում եմ ասել, որ ես ինձանից եմ սկսելու, որպեսզի բոլորը հասկանան, որ պետք է հավասարություն լինի»,-  ասաց Աբրահամյանը:

Նա նշեց, որ իր ուղերձն ուղղված է բոլորին՝ իրենից սկսած: «Գործարարությամբ զբաղվելը ամոթ բան չի. եթե գործարար լինեն, բոլորն էլ այդ մասին կասեն: Մենք կողմ ենք, որպեսզի բոլորն էլ զբաղվեն բիզնեսով, սակայն դա պետք է լինի հավասար պայմաններում: Եվ ես խնդրում եմ, որպեսզի բոլորն աշխատեն հավասար դաշտում, իսկ եթե ոչ, ապա մենք կկիրառենք մեր լծակները»,- ընդգծեց նա՝ հավելելով, որ հարկավոր է ամեն ինչ անել, որպեսզի օտարեկրյա ներդրողների համար նույնպես Հայաստանը գրավիչ դառնա:

Անդրադառնալով մամուլի հրապարակումներին, թե Հայաստանում գործարար ոլորտում չի կարող հավասարություն լինել՝ վարչապետը կոչ արեց հրապարակել օբյեկտիվ տեղեկատվություն՝ դրսից եկող ներդրումներին հոսքը չխոչընդոտելու համար:

Իսկ հարցին' Հայաստանում շարքային գործարարները կարո՞ղ են հավասար պայմաններում աշխատել խոշոր գործարարների հետ, Աբրահամյանը պատասխանեց, որ չի ցանկանում անուններ առանձնացնել, սակայն իր ուղերձը, որ բոլորը պետք է աշխատեն հավասար պայմաններում, վերաբերում է անխտիր բոլորին:

Հարցին, թե ինքը գործարարների հետ խոսել է վերջնագրերի լեզվով, Աբրահամյանը պատասխանեց, որ ինքը որևէ մեկի առջև վերջնագիր չի դրել, ուղղակի առաջարկել է նոր խաղի կանոն՝ կոչ է արել աշխատել հավասար դաշտում: