«Հրապարակ». Փորձում են «Քաղաքացիական պայմանագրի» և Բաղրամյան 26-ի միջեւ կապի իմիտացիա ստեղծել, որպեսզի սեփականը քողարկեն

«Քաղաքացիական պայմանագիր» հանրային-քաղաքական միավորումն իր գործունեության ընթացքում այնպիսի խնդիրներ եւ ծրագրեր առաջ չի քաշելու, որոնց լուծումը կարճաժամկետ կտրվածքով չի տեսնում: «Մենք այն ժամանակ հանրահավաքներ կհրավիրենք, մարդկանց կհանենք փողոց, երբ ունենանք կոնկրետ խնդիրներ ու դրանց լուծման կոնկրետ ճանապարհային քարտեզներ: Չենք պատրաստվում հիասթափեցնել ժողովրդին եւ այս պահին իշխանափոխության կոչեր անել»,-ասաց «Քաղաքացիական պայմանագիր» հանրային-քաղաքական միավորման խորհրդի անդամ Արայիկ Հարությունյանը։ Նրա խոսքով, ծայրահեղ քայլերն այս պահին օրակարգային չեն, իսկ իշխանափոխություն կարող է լինել նաեւ ընտրությունների միջոցով:

«Օգտագործելու ենք նաեւ խորհրդարանական ամբիոնը՝ սեփական գաղափարները, օրակարգը, պատկերացումները ավելի լայն հասարակությանը հասցնելու համար»,-ասաց Հարությունյանը։ ԱԺ «Հայ ազգային կոնգրես» խմբակցության անդամ Նիկոլ Փաշինյանի խոսքով էլ «Քաղաքացիական պայմանագիր» հանրային-քաղաքական միավորումը թեւակոխում է նոր փուլ, որի արդյունքը լինելու է ինստիտուցիոնալ ընդդիմության ձեւավորումը։

«Պոտենցիալ գործընկեր տեսնում ենք քաղաքացիական հասարակությանը, իսկ եթե քաղաքական ուժերը ցանկանան համագործակցել, ապա շատ հստակ պետք է լինի, թե ինչի համար են համագործակցում, եւ համագործակցող կողմերից յուրաքանչյուրն ինչպիսի պարտավորություններ ու իրավունքներ է ունենալու»,-ասաց Փաշինյանը։ Ինչ վերաբերում է հարցին, թե հնարավո՞ր է «Քաղաքացիական պայմանագիրը» վերածվի կուսակցության, Փաշինյանն ասաց, որ այդ հարցը պետք է քննարկվի «Քաղաքացիական պայմանագրի» առաջին համագումարի ընթացքում, որը կայանալու է այս տարի կամ հաջորդ տարվա առաջին կեսին: «Քաղաքացիական պայմանագիր» նախաձեռնության՝ Բաղրամյան 26-ից ուղղորդվելու մասին շրջանառվող լուրերի հետ կապված՝ Նիկոլ Փաշինյանը նշեց, որ այն ուժերը, որոնք պաշտպանում են Սերժ Սարգսյանին, ամեն ինչ անելու են «Քաղաքացիական պայմանագիր» նախաձեռնության եւ Բաղրամյան 26-ի միջեւ կապի իմիտացիա ստեղծել, որպեսզի սեփական կապերը քողարկեն։

Շարունակությունը` «Հրապարակ» օրաթերթի այսօրվա համարում: