ԱԺ-ն ընդունեց պետական պահպանության ենթակա անձանց ծախսերը գաղտնիության պայմաններում իրականացնելու վերաբերյալ նախագիծը

Ազգային ժողովն առաջին ընթերցմամբ ընդունեց «Գնումների մասին» Հայաստանի Հանրապետության օրենքում լրացում կատարելու մասին և «Պետական և ծառայողական գաղտնիքի մասին» Հայաստանի Հանրապետության օրենքում լրացում կատարելու մասին: Օրինագծերին կողմ քվեարկեց 65, դեմ՝ 41, ձեռնպահ՝ 2 պատգամավոր:

Օրենքի նախագծերով առաջարկվում է հատուկ պետական պաշտպանության ենթակա անձանց կեցության, սննդի և տրանսպորտային սպասարկման, այդ թվում' տրանսպորտի տեխնիկական սպասարկման և նորոգման, արարողակարգային ծախսերի, այդ թվում' պաշտոնական պատվիրակությունների ընդունելությունների նպատակով միջոցառումների սպասարկման ծախսերը իրականացնել գաղտնիության պայմաններում: Հիմնական զեկուցող, ՀՀ ԱԱԾ տնօրենի տեղակալ Արզուման Հարությունյանը նշեց, որ նախագծի նպատակը պետական պաշտպանության ենթակա անձանց անվտանգության ապահովումն է:

Վերը նշված անձանց անվտանգության լիարժեք ապահովման նպատակով անհրաժեշտ է նաև խիստ հսկողություն սահմանել և գաղտնիության պայմաններում իրականացնել նրանց սննդի ձեռքբերման, կեցության և տրանսպորտային սպասարկման, ինչպես նաև արարողակարգերի հետ կապված գործառնությունները: Նշվածով պայմանավորված անհրաժեշտություն է առաջացել «Գնումների մասին» ՀՀ օրենքում կատարել փոփոխություն' նախատեսելով, որ «Հատուկ պետական պաշտպանության ենթակա անձանց անվտանգության ապահովման մասին» ՀՀ օրենքի 5-րդ հոդվածի 2-րդ և 3-րդ մասով սահմանված հատուկ պետական պաշտպանության ենթակա անձանց կեցության, սննդի և տրանսպորտային սպասարկման, ինչպես նաև արարողակարգերի իրականացման համար անհրաժեշտ ապրանքները, աշխատանքները և ծառայությունները նույնպես ներառվելու են պետական կամ ծառայողական գաղտնիք պարունակող գնումների պլանում' համապատասխան լրացում կատարելով նաև «Պետական և ծառայողական գաղտնիքի մասին» ՀՀ օրենքում: