ԱԺ-ն ընդունեց պետական պարգևները և պատվավոր կոչումները սահմանող օրինագիծը

Ազգային ժողովն առաջին ընթերցմամբ ընդունեց Հայաստանի Հանրապետության պետական պարգևների և պատվավոր կոչումների մասին օրենքի նախագիծը: Օրենքի նախագծին կողմ քվեարկեցին 90, դեմ՝6, ձեռնպահ' 6 պատգամավոր:

Նախագծով սահմանվում են պետական պարգևները և պատվավոր կոչումները, դրանց տեսակները, կարգավորվում են Հայաստանի Հանրապետության պետական պարգևներ հիմնելու, պետական պարգևներով պարգևատրելու և պատվավոր կոչումներ շնորհելու կարգի ու պայմանների և պետական պարգևները կրելու կանոնների հետ կապված հարաբերությունները: Նախագծով առաջարկվում է ընդունել «Հայաստանի Հանրապետության պետական պարգևների և պատվավոր կոչումների մասին» մեկ միասնական օրենքի նախագիծը, որով կմիավորվեն գործող «Հայաստանի Հանրապետության պետական պարգևների մասին» և «Հայաստանի Հանրապետության պատվավոր կոչումների մասին» ՀՀ գործող օրենքները: Կատարվում են լայնածավալ փոփոխություններ նշված երկու օրենքներում, համապարփակ կարգավորման են ենթարկվում պետական պարգևների և պատվավոր կոչումների տեսակների, պետական պարգևներ հիմնելու, պետական պարգևներով պարգևատրելու և պատվավոր կոչումներ շնորհելու կարգի ու պայմանների, պետական պարգևները և պատվավոր կոչումները կրելու կանոնների և դրանց հերթականության հետ կապված հարաբերությունները: Սահմանվել են պետական պարգևներով պարգևատրվող և պատվավոր կոչումներ ստացող անձինք և մարմինները, այն անձանց իրավունքները և պարտականությունները, ում շնորհվել են պետական պարգևներ և կոչումներ:

Միաժամանակ նախատեսվել են նաև մի շարք նոր կարգավորումներ, այդ թվում՝ պարգևների նոր տեսակներ՝ Երախտագիտության մեդալը, Աշխատանքային վաստակի համար մեդալը, Ծնողական փառքի մեդալը: Սահմանվել է, որ Ծնողական փառքի մեդալ շնորհվում է Հայաստանի Հանրապետության քաղաքացի հանդիսացող այն ծնողներին (ծնողին), որդեգրողներին (որդեգրողին), որոնք դաստիարակել և դաստիարակում են 6 և ավելի զավակ։

Նախագծով նախատեսվել են դրույթներ նաև նախկին ԽՍՀՄ և ՀԽՍՀ պետական պարգևների վերաբերյալ, որոնցով պարգևատրել են ՀՀ քաղաքացիները: Սահմանվել է, որ Հայաստանի Հանրապետության քաղաքացիներին նախկինում շնորհված ԽՍՀՄ և ՀԽՍՀ պետական պարգևները պահպանում են իրենց ուժը:

Միաժամանակ, նախագծով սահմանվել է Հայաստանի Հանրապետության պետական պարգևների և պատվավոր կոչման կրծքանշանների նկատմամբ ապօրինի գործողություններ կատարելու արգելքը: Նախատեսվել է նաև արգելք այնպիսի նշաններ, հուշադրամներ, հուշամեդալներ և կրծքանշաններ կրելու, գնելու, վաճառելու, պատրաստելու, փոխանակելու կամ այլ կերպ իրացնելու, որոնք շփոթության աստիճան նման են Հայաստանի Հանրապետության շքանշաններին, մեդալներին և պատվավոր կոչման կրծքանշաններին։ Վերոհիշյալ գործողությունների համար նախատեսվել է վարչական պատասխանատվություն: Իսկ բուն պ ատասխանատվության չափի հետ կապված կարգավորումները նախատեսվել են Վարչական իրավախախտումների վերաբերյալ ՀՀ օրենսգրքում: