ՀՀԿ-ն խուսափում է պարզաբանումից

Սյունիքի մարզի 5 համայնքում հունիսի 8-ին կայանալիք ՏԻՄ ընտրությունների թեկնածուների առաջադրումների ժամկետն ավարտվել է: Գորիսի քաղաքապետի պաշտոնի համար կպայքարի 4 թեկնածու, որոնցից 2-ը ՀՀԿ-ական են, մյուս 2-ը՝ անկուսակցական:

Գորիսի համայնքի ղեկավարի համար ՀՀԿ-ն առաջադրել է «ՀՋԿ» ՓԲԸ Գորիսի տեղամասի պետ Ադունց Վաչագանի թեկնածությունը: Ինքնաառաջադրվել են «Վարարակն» ՍՊԸ տնօրեն, ՀՀԿ անդամ Արա Բուդաղյանը, «ԳՈՐԻՍԻ ԳԱՄՄԱ» ԲԲԸ գործադիր տնօրեն, անկուսակցական Տիգրան Կարապետյանը և «ՇԱՆԻ» ՍՊԸ տնօրեն, անկուսակցական Հրայր Յոլյանը:

Արա Բուդաղյանը անցած տարի հունիսի 1-ին Սյունիքի նախկին մարզպետ Սուրիկ Խաչատրյանի առանձնատան մոտ սպանված Ավետիք Բուդաղյանի եղբայրն է: Հիշեցնենք, Բուդաղյան եղբայրներից մեկն էլ' Արտակ Բուդաղյանը, վիրավորվել էր: Կալանավորվել էին Սուրիկ Խաչատրյանի որդին և թիկնապահը, սակայն գործը կարճվել է:

Լուրեր.com-ը զրուցեց ՀՀԿ կազմակերպչական գծով փոխնախագահ Ռուբեն Թադևոսյանի հետ` ճշտելու, թե ի վերջո ՀՀԿ-ն ո՞ւմ է սատարելու առաջիկա ընտրություններում, Թադևոսյանը խուսափեց հարցին պատասխանելուց և նշեց. «Ես այժմ խորհրդակցության եմ, իսկ այդ հարցով դիմեք մեր լրատվական ծառայությանը»:

Նշենք, որ արդեն տևական ժամանակ է, ինչ հայտնի են առաջադրված թեկնածուները, սակայն ՀՀԿ-ականները խուսափում են պարզաբանելուց, թե ի վերջո ՀՀԿ-ական երկու թեկնածուներից ում է սատարելու ՀՀԿ-ն: