Անուշ Արշակյանը ներողություն խնդրեց. մտքի սխալ ձևակերպում է տեղի ունեցել և թյուրըմբռնում (տեսանյութ)

Անուշ և Ինգա Արշակյան քույրերը վերջին շրջանում հայտնվեցին մամուլի և հասարակության ուշադրության կենտրոնում:  Aravot.am-ի հետ զրույցում Անուշ Արշակյանը Կոնչիտա Վյուրստի մասին ասել էր. «Եթե համարենք, որ այդ մարդիկ հիվանդ են, նրանց կարելի է բուժել, և այդ առումով իմ հակակրանքը հասկանալի է: Ինչպես հոգեկան հիվանդն է հակակրանք առաջացնում, այնպես էլ նման երևույթները: Իմ հակակրանքը ճիշտ այդպիսին է: Ես ոչ թե ագրեսիվ եմ, այլ՝ մերժողական այդպիսի դրսևորումների հանդեպ»:

Քիչ առաջ Անուշ Արշակյանը «Ազատություն» ռ/կ-ի ֆեյսբուքյան ասուլիսի ժամանակ, մեկնաբանելով այդ հարցազրույցը, ներողություն խնդրեց.

«Մեծ հարգանք ունենալով դեպի լրագրողը` պետք է ասեմ, որ հարցադրումն արդեն սխալ էր, էթիկայի կանոններից դուրս։ Լրագրողը հարցրեց՝ ինչպես են կոնչիտաներն ազդում հայկական ընտանիքների վրա, ի՞նչ եք կարծում` նրանք վտանգ ներկայացնո՞ւմ են, թե՞ ոչ։ Հենց ամենասկզբից, փաստորեն, ենթատեսքով էր տրված հարցը։ Իմ ամբողջ նեգատիվ գնահատականը վերաբերում էր միայն ու միայն Կոնչիտա Վյուրստի կերպարին, որը ես մանրամասնեցի:

Ես գնահատում եմ ոչ միայն երգը, այլև արտաքին տեսքը, բեմական կերպարը, անունը, որը ընտրել է արտիստը: Եվ միայն ես չեմ դա գնահատում: Բոլորը պետք է գնահատեն դա, և եթե ինչ-որ մարդիկ վիրավորվել են այն բանից, թե ինչ է հնչել՝ համարելով, որ ես նրանց եմ անձամբ վիրավորել, ես ներողություն եմ խնդրում: Միտք չունեի վիրավորել  ո'չ սեռական փոքրամասնություններին, ո'չ տրանսվեստիտներին, ո'չ էլ, առավել ևս, հոգեկան հիվանդություն ունեցող մարդկանց։ Մտքի սխալ ձևակերպում է տեղի ունեցել և թյուրըմբռնում, որովհետև աղմուկ էր, մենք գերլարված էինք: Ես իսկապես շատ ցավում եմ նման թյուրիմացության համար»: