«Առավոտ». Սահմանադրական բարեփոխումները չեն խոչընդոտում սոցիալ-տնտեսական բարեփոխումներին

Սահմանադրական բարեփոխումները չեն խոչընդոտում սոցիալ-տնտեսական բարեփոխումներին. Կարծում է սահմանադրական բարեփոխումների հանձնաժողովի անդամ Գագիկ Ղազինյանը:

- Պարոն Ղազինյան, վերջին շրջանում հաճախ կարծիքներ են հնչում, որ այս պահին ՀՀ-ի առջև ծառացած խնդիրները պահանջում են սոցիալ-տնտեսական բարեփոխումների անհրաժեշտություն, և չկա որևէ կենսական խնդիր, որի լուծմանը խոչընդոտի գործող Սահմանադրությունը: Որքանո՞վ են արդի փուլում սահմանադրական բարեփոխումներն անհրաժեշտ մեր հասարակությանը:

- Կարծում եմ, որ Ձեր հարցն անհրաժեշտ է դիտարկել երկու հիմնական հարթությունների տեսանկյունից: Առաջին հերթին անհրաժեշտ է նկատի ունենալ, որ հասարակական հարաբերությունները դինամիկ բնույթ ունեն և գտնվում են անընդհատ զարգացման ու փոփոխման ընթացքում: Այդ է պատճառը, որ միշտ էլ առաջանում է դրանց կանոնակարգմանն ուղղված իրավակարգավորումների բարեփոխման անհրաժեշտություն: Դա առաջին հերթին վերաբերում է Սահմանադրությանը, քանզի հենց վերջինս է իրավական ամբողջ համակարգի հիմքն ու բնականոն զարգացման գրավականը: Հետևաբար, Սահմանադրությունը' որպես հիմնական օրենք, պետք է հասարակական միջավայրի առաջընթացի խթան հանդիսանա և որևէ իրավիճակում չվերածվի փաստացի փոփոխված հասարակական հարաբերությունների գոյության ու զարգացման խոչընդոտի:

Միևնույն ժամանակ հարկ է նկատի ունենալ, որ սահմանադրական զարգացումները պետք է հանդես գան որպես համալիր բնույթ կրող գործընթաց՝ ընգրկելով ոչ միայն որոշակի տեքստային փոփոխություններ, այլ նաև համարժեք իրավական մշակույթի ձևավորում: Այդ առումով ակնհայտ է, որ որքան էլ կատարյալ լինեն տեքստային կոնկրետ լուծումները, դրանք երբևէ չեն կարող հասարակական հարաբերությունների ելակետային կարգավորիչ դառնալ, եթե չլինի համարժեք իրավական մշակույթ ու կայացած քաղաքացիական հասարակություն: Եզրահանգումը մեկն է՝ նշված քայլերի իրականացումը պետք է բոլոր դեպքերում միաժամանակյա բնույթ կրի և չի կարող հաջողություն ունենալ դրանցից թեկուզ մեկի, այդ թվում՝ սահմանադրական տեքստային փոփոխությունների բացակայության պարագայում:

Շարունակությունը` «Առավոտ» օրաթերթի այսօրվա համարում: