«Թանգարանային գիշեր 2014». մայրաքաղաքի թանգարանների ուշագրավ միջոցառումները

«Թանգարանները միավորում են մեզ» խորագրի ներքո մայիսի 17-ին Հայաստանի և Արցախի 100 թանգարաններ իրենց դռները կբացեն հազարավոր այցելուների միջև: Տարբեր մշակութային օջախներ կազմակերպել են են տարատեսակ տոնական միջոցառումներ: Ձեզ ենք ներկայացնում երևանյան մի շարք թանգարանների հետաքրքիր միջոցառումները, որոնց արժե մասնակցել: 

Հայաստանի ազգային պատկերասրահում մայիսի 17-ին հնարավոր է դիտել Ժան Կազանջյանի, Բրունո Բրունիի և Հակոբ Հակոբյանի անհատական ցուցահանդեսները, ինչպես նաև լսել «Հայաստանի փոքրիկ երգիչներ» երգչախմբի ելույթները: Մայիսի 18-ին թանգարանում կներկայացվի Սալվադոր Դալիի գրաֆիկական ստեղծագործությունների ցուցահանդեսը, ինչպես նաև Կազանջյանի ցուցահանդեսի կատալոգի շնորհանդեսը:

Հայաստանի պատմության թանգարանում բացվել է երկու ցուցահանդես' «Տարագիր գերդաստաններ» և «Վանի ասեղնագործությունը» խորագրով:

Մեսրոպ Մաշտոցի անվան հին ձեռագրերի ինստիտուտում հնարավոր է դիտել Մատենադարանին նվիրված ֆիլմ' «Վիրտուալ մատենադարան» ցուցասրահում:

Ե. Չարենցի անվան գրականության և արվեստի թանգարանում մայիսի 17-ին «Արտբրիջ» գրախանութը կանցկացնի գրքերի ցուցահանդես-վաճառք, իսկ մայիսի 18-ին նախատեսված է հանդիպում արձակագիր Արամ Պաչյանի հետ:

Արամ Խաչատրյանի տուն-թանգարանում սպասվում է Դիմակների մրցույթ-ցուցահանդես, ինչպես նաև պարի ուսուցում:

Հովհ. Թումանյանի թանգարանում կկազմակերպվի «Ամենայն Հայոց թամադան» բաժակաճառերի մրցույթ, ինչպես նաև «Վարդատոնի 100-ամյա հոբելյան» խորագրով համերգ:

Ալ. Սպենդիարյանի տուն-թանգարանում, բացի ցուցադրություններից, այցելուներն, ըստ ավանդույթի կվայելեն կակաո, իսկ Ավ. Իսահակյանի տուն-թանգարանում կանցկացվի հայկական ռոմանսի երեկո: Ե. Չարենցի տուն-թանգարանում ելույթ կունենա Կոմիտասի քառյակը:

Երևան քաղաքի պատմության թանգարանում կներկայացվի «Հին Երևանի անցուդարձը» 3D անիմացիան, իսկ Սերգեյ Փարաջանովի թանգարանում' Հենրիկ և Վաղարշակ Էլիբեկյանների' Ս. Փարաջանովին նվիրված ցուցահանդես:

Այսքանով չեն ավարտվում մայրաքաղաքի թանգարանների միջոցառումները: Տոնակատարություններ կլինեն նաև ամբողջ Հայաստանում և Արցախում: