Կարեն Ջանիբեկյանն ու «Վանա կատուն»` Սունդուկյանի բեմին

Գաբրիել Սունդուկյանի անվան ազգային ակադեմիական թատրոնի բեմում մայիսի 28-ին հանդիսատեսը հնարավորություն կունենա դիտել հեղինակ Լիանա Անթառանյանի «Վանա կատուն» խորհրդանշական անվանումով ներկայացման առաջնախաղը, որը նվիրում է Մեծ եղեռնի 100-րդ տարելիցին: «Արմենպրես»-ի թղթակցի հետ զրույցում Անթառանյանը նշեց, որ ինքը ներկայացման մեջ հանդես է գալիս որպես բեմադրիչ, ռեժիսոր, սցենարի հեղինակ, ինչպես նաև երաժշտության և հագուստի ձևավորող: «Սարերում կյանք կա» և «Անառակ դստեր վերադարձը» կենցաղային դրամաներից հետո սա հեղինակի առաջին մեծ, ինքնուրույն աշխատանքն է, որտեղ մեկտեղվել են նրա դրամատուրգիական և բեմադրական ողջ գիտելիքները:

«Ներկայացման գլխավոր դերակատարը Կարեն Ջանիբեկյանն է, բացի նրանից, ներգրավված են նաև Սունդուկյանի թատրոնի տասը դերասաններ, ինչպես նաև երկու երեխա»,- պատմեց բեմադրիչը:

«Վանա կատու» ներկայացման մեջ ցուցադրված է, թե ինչ է մտածում մայր Հայաստանը, ինչ ցավեր ունի Վանա կատուն: Նրա տեղեկացմամբ' դրաման անդրադարձ է ոչ միայն Հայոց ցեղասպանությանը և դրա հետևանքներին' հայաթափմանը, հայրենիքի կորստին, այլև արդիական խնդիրների: «Մենք այժմ պետք է գործով հայրենիքի հանդեպ սերն ապացուցենք և չլքենք այն»,- կարծիք հայտնեց Անթառանյանը' ավելացնելով, որ մեկ գործողությամբ ներկայացումն անմասն չի մնացել նաև արտագաղթի, երիտասարդության թեմաներից:

Դրամայում Վանա կատուն սպասում է իր տերերի վերադարձին' անհանգստանալով, որ նրանք ուշանում են: Գործողությունները ծավալվում են Վանա լճի կղզում, Սուրբ Խաչ եկեղեցու բակում: «Վանա կատու» ներկայացումը:

«Գուրգեն Ջանիբեկյան» հիմնադրամի «Գուրջան» թատրոնինն է, որի իրականացմանն իր աջակցությունն է ցուցաբերել նաև Երևանի քաղաքապետ Տարոն Մարգարյանը: Անթառանյանը շնորհակալ է քաղաքապետին ֆինանսական աջակցության, ինչպես նաև Սունդուկյանի թատրոնի տնօրինությանն արդեն շուրջ երեք ամիս բեմում փորձեր անցկացնելու հնարավորություն ընձեռելու համար:

Կայանալիք պրեմիերայի տոմսերի արժեքը 1000-2500 դրամ է: Լիանա Անթառանյանն այժմ սովորում է Երևանի պետական համալսարանի ռեժիսուրայի և մասսայական հանդիսությունների բաժնում: Նա դերասան, ՀՀ ժողովրդական արտիստ Կարեն Ջանիբեկյանի կինն է: Նրանց կողմի ստեղծված «Գուրգեն Ջանիբեկյան» հիմնադրամն արդեն չորս տարվա կենսագրություն ունի: