«Հավաքականի զբաղեցրած 33-րդ հորիզոնականը չի կարող ինձ բավարարել». Ռուբեն Հայրապետյան (տեսանյութ)

Հայաստանի ֆուտբոլի ֆեդերացիայի տեխնիկական կենտրոնում' ֆուտբոլի ակադեմիայում, տեղի ունեցավ ՀՖՖ 12-րդ տարեկան ժողովը: Ժողովում հաշվետվությամբ հանդես եկավ ՀՖՖ նախագահ Ռուբեն Հայրապետյանը: Նախորդ ֆինանսական տարվա հաշվապահական հաշվեկշիռը և ֆինանսական հաշվետվությունը, ՀՖՖ ժողովի պատվիրակների հաստամանը ներկայացրեց ՀՖՖ առաջին փոխնախագահ և գործադիր տնօրեն Արմեն Մինասյանը: Միջոցառմանը ներկա էր նաև ՈՒԵՖԱ-ի Գործկոմի անդամ Սերգեյ Ֆուրսենկոն: ՀՖՖ նախագահն իր ելույթում ներկայացրել է այն կարևորագույն և առաջնային խնդիրները, որոնք լուծել է ՀՖՖ այս ընթացքում՝ հետևելով ֆուտբոլի զարգացման մեր ծրագրային քաղաքականությանը: Ինչպես տեղեկացրին Հայաստանի ֆուտբոլի ֆեդերացիայից, ՀՖՖ նախագահ Ռուբեն Հայրապետյանը իր ելույթում մասնավորապես նշել է. «Կարևոր եմ համարում նաև նպաստավոր համագործակցությունը ՈՒԵՖԱ-ի եւ ՖԻՖԱ-ի կառույցներ ի հետ, միջազգային կրթական եւ վերապատրաստման ծրագրերում ներգրավված լինելը, ֆուտբոլի մասսայականացումը, ազգային առաջնության հետեւողական զարգացման համար հետագա նախադրյալների ստեղծումը»:

Հայրապետյանը հայտարարել է, որ Գյումրիում արդեն ավարտվել է ֆուտբոլի ակադեմիայի կառուցումը: «Շիրակի տարածաշրջանի համար ստեղծվել է նախադեպը չունեցող ժամանակակից ֆուտբոլային մի ենթակառուցվածք, որի հանդիսավոր բացմանը կմասնակցենք առաջիկայում: Այսօր արդեն Գյումրիում ունենք 8 հեկտար տարածություն զբաղեցնող, արհեստական 2 եւ բնական խոտածածկով 6 խաղադաշտերով, մարզչական, մրցավարական եւ այլ ենթակառուցվածքների գործունեությունն ապահովող 400 քառակուսի մետր տարածք զբաղեցնող եռահարկ կառույցով այնպիսի ֆուտբոլային մի ենթակառուցվածք, որ Գյումրին երբեք չի ունեցել»,-ասել է նա:

«Մենք սկսել ենք նաեւ Վանաձորի ֆուտբոլի ակադեմիայի շինարարական աշխատանքները: Առաջիկայում մենք զարգացած ֆուտբոլային ենթակառուցվածք կունենանք նաեւ մեր երկրի այս տարածաշրջանում: Դրա արդյունքում ինչպես Վանաձորը, այնպես էլ ամբողջ Լոռվա տարածաշրջանը կունենան ֆուտբոլի զարգացման լուրջ հեռանկարներ, մարզական կյանքը, տնտեսական եւ սոցիալական ենթակառուցվածքները զարգացնելու նախադրյալներ»,- առանձնացրել է Հայրապետյանը:

Նա խոսել է նաև Հայաստանի ազգային թիմի առաջընթացի մասին, ներկաներին ներկայացնելով ՖԻՖԱ-ի վարկանիշային աղյուսակում Հայաստանի հավաքականի առաջընթացը նախորդ տարվա համեմատ: «Ինչպես գիտեք, ես երբեք բավարարված չեմ զգացել կատարված աշխատանքով եւ շարունակելու ենք լուծել մեր ծրագրային քաղաքականությամբ նախատեսված բոլոր խնդիրները»,-եզրափակել է Հայրապետյանը:

Անցյալ տարի Հայաստանի ազգային հավաքականը ՖԻՖԱ-ի դասակարգման աղյուսակում զբաղեցնում էր 66-րդ հորիզոնականը: Այսօր Հայաստանի ազգային հավաքականը զբաղեցնում է 33-րդ հորիզոնականը: Հայաստանի ֆուտբոլի ազգային թիմը առաջիկա մայիսին ընկերական հանդիպում կանցկացնի Ալժիրի և ԱՄԷ-ների հավաքականի հետ, իսկ հունիսի 5-ին մեր ընտրանին ընկերական հանդիպում կանցկացնի Գերմանիայի թիմի հետ: