Բեյոնսեն մեկնաբանել է իր քրոջ և ամուսնու վիճաբանությունը

Ամերիկացի երգչուհի Բեյոնսեն պաշտոնական հայտարարություն է կատարել, որտեղ խոսել է իր քրոջ՝ Սոլանժի և ամուսնու՝ Ջեյ Զիի սկանդալային վիճաբանության մասին: Սկանդալային տեսանյութի համացանցում հայտնվելուց հետո, որը տեսագրվել էր «Standard Hotel» հոթելի վերելակում, մամուլում ասեկոսեներ տարածվեցին իդեալական զույգի՝ Բեյոնսեի և Ջեյ Զիի հարաբերություններում խնդիրների առկայության մասին: Հիշեցնենք, որ տեսանյութում հստակ երևում է, թե ինչպես է ամերիկացի փոփ-դիվա Բեյոնսեի կրտսեր քույրը՝ Սոլանժ Նոուլզը բռունցքներով հարձակվում արտիստուհու ամուսնու՝ Ջեյ Զիի վրա: 

Տեսանյութի հայտնվելուց հետո Բեյոնսեն առաջին անգամ խախտել է լռությունը և պաշտոնական հայտարարություն տարածել, որտեղ նշել է, որ Ջեյ Զին և Սոլանժը արդեն մոռացել են տհաճ միջադեպի մասին: Իսկ վիճաբանության պատճառի մասին արտիստուհին հրաժարվել է խոսել:

-«Ամենակարևորն այն է, որ մենք մեկ ընտանիք ենք և կհաղթահարենք ցանկացած դժվարություն,-նշում է երգչուհին հայտարարության մեջ,- Ջեյ Զին ու Սոլանժը գիտակցում են միմյանց հանդեպ կատարած իրենց սխալը, և, անշուշտ, պատասխանատվություն են կրում իրենց արարքների համար: Նրանք արդեն ներողություն են խնդրել միմյանցից և, իհարկե, ներել են իրար, քանի որ միշտ էլ եղել են մեկ ընտանիքի պես: Բազմաթիվ ասեկոսեները այն մասին, թե իբր Սոլանժը եղել է ալկոհոլի ազդեցության տակ, միանգամայն սուտ է: Բոլոր ընտանիքներում էլ լինում են դժվարություններ, և մենք բացառություն չենք: Մենք սիրում ենք իրար և անկախ ամենից, մնում ենք ընտանիք: Մենք ուզում ենք մոռանալ այդ տհաճ միջադեպի մասին,խորհուրդ եմ տալիս հետևել մեր օրինակին և դադարել ենթադրություններ անել»: