ԵԱՀԿ համանախագահների մեքենաների շարասյան ճանապարհը Բերձորում փակել են (ֆոտո)

Քաշաթաղի շրջկենտրոն Բերձորում մայիսի 17-ին Արցախում գործող մի շարք երիտասարդական կազմակերպությունների անդամներ՝ որպես բողոքի նոտա, փակել են շրջկենտրոն ժամանած ԵԱՀԿ համանախագահների մեքենաների շարասյան ճանապարհը և պահանջել, որպեսզի համանախագահները իջնեն մեքենայից՝ երիտասարդության ձայնը լսելու համար: Ընդառաջելով երիտասարդության պահանջին՝ ԵԱՀԿ Մինսկի խմբի համանախագահներ Իգոր Պոպովը (Ռուսաստան), Ջեյմս Ուորլիքը (ԱՄՆ), Ժակ Ֆորը (Ֆրանսիա) և ԵԱՀԿ գործող նախագահի անձնական ներկայացուցիչ Անջեյ Կասպրշիկը, մեքենաներից իջնելով, զրուցել են երիտասարդների հետ և լսել նրանց պահանջները: Զրույցին մասնակցում էին նաև առաջիկայում նշանակվելիք ֆրանսիացի նոր համանախագահ Պիեռ Անդիոն և ԼՂՀ արտաքին գործերի նախարար Կարեն Միրզոյանը:

Մասնավորապես, Արցախի երիտասարդական կառույցների ներկայացուցիչները, պաստառներ պարզելով և կոչեր հնչեցնելով, արտահայտել են իրենց վրդովմունքը համանախագահների կողմից ղարաբաղյան հիմնախնդրի վերաբերյալ վերջերս ընդունած համատեղ հայտարարության և հատկապես ԵԱՀԿ Մինսկի խմբում ԱՄՆ-ը ներկայացնող Ջեյմս Ուորլիքի կողմից Խաղաղության Քարնեգի միջազգային հիմնադրամում հնչեցրած վեց կետանոց համաձայնագրի դրույթներում ցուցաբերած միակողմանի մոտեցման համար:

Oգտվելով ընձեռված բացառիկ հնարավորությունից՝ «Արցախպրես»-ի թղթակիցը հարցեր է ուղղել ԱՄՆ-ն և Ռուսաստանը ներկայացնող համանախագահներին:

ԱՄՆ-ն ներկայացնող համանախագահին ուղղված այն հարցին, թե Միջազգային խաղաղության Քարնեգի հիմնադրամում իր կողմից հնչեցրած Միացյալ Նահանգների քաղաքական տեսակետը ղարաբաղյան հիմնախնդրի կարգավորման հարցում որքանով է համընկնում համանախագահող մյուս երկրների տեսակետների հետ, Ջեյմս Ուորլիքը պատասխանեց, որ համանախագահող երկրների տեսակետները հիմնականում համընկնում են, և այն արտահայտված է հրադադարի համաձայնագրի 20-ամյակի կապակցությամբ ԵԱՀԿ Մինսկի խմբի համանախագահների կողմից մայիսի 12-ին ընդունած հայտարարության մեջ: Ինչ վերաբերում է տարածքն երի «վերադարձման» համանախագահների պատկերացումներին ամերիկացի միջնորդը խուսափեց որևէ հստակեցում անել՝ նշելով, որ բանակցությունները դեռ շարունակվում են:

Այն հարցին, թե ինչքանով է համոզված, որ Արցախում սիրիահայեր չեն ապրում, որի մասին իր հարցազրույցներից մեկում վերջերս նշել էր ռուսաստանցի համանախագահը, Իգոր Պոպովը նշեց, որ ինքը անձամբ որևէ սիրիահայի Արցախում չի հանդիպել:

Այնուհետև համանախագահները մեկնել են Քաշաթաղի շրջվարչակազմ, որտեղ փակ դռների ետևում հանդիպում են ունեցել Քաշաթաղի շրջվարչակազմի ղեկավար Սուրեն Խաչատրյանի հետ, որից հետո վերադարձել են Ստեփանակերտ, որտեղ մայիսի 18-ին հանդիպում է նախատեսված ԼՂՀ նախագահ Բակո Սահակյանի հետ:

Բերձորում համանախագահների գտնվելու ամբողջ ընթացքում երիտասարդների բողոքի ցույցը շարունակվել է: