Էրդողանը` որպես մերօրյա Հիտլեր

Թուրքիայի Մանիսա նահանգի Սոմա քաղաքի ածխահանքում մայիսի 14-ին տեղի ունեցած աղետի վայր մեկնած վարչապետ Ռեջեփ Թայիփ Էրդողանին տեղի բնակչությունը դիմավորել էր զանգվածային բողոքի ակցիայով: Ցուցարարները պահանջել են Էրդողանի հրաժարականը, նրան «մարդասպան», «գող» անվանել և հայտարարել, որ աղետի համար, որի հետևանքով մեծ թվով հանքափորներ են զոհվել, պատասխանատու է Էրդողանի գլխավորած' իշխող «Արդարություն և զարգացում» կուսակցությունը:

Թուրքական ԶԼՄ-ները լայնորեն լուսաբանել էին Էրդողանի' միջադեպի վայր մեկնելու և բողոքի ակցիայի ժամանակ նրա կողմից մի երիտասարդի բռունցքով հարվածելու, նրան ուղեկցող խորհրդականի կողմից էլ մի այլ երիտասարդի ոտքով հարվածելու դեպքերն ու դրանց նկատմամբ հանրության բացասական արձագանքը: Նշվել էր, որ զայրացած ամբոխից վախեցած Էրդողանը մտել է մոտակա խանութ, որպեսզի կարողանա հետո հանգիստ հեռանալ:

Թուրքագետ Անդրանիկ Իսպիրյանը տեղի ունեցած դեպքերը բնութագրեց որպես պետական մակարդակով ծեծ` հանքափորի աղետյալներին:

«Ինչո՞ւ Էրդողանը գնաց այս քայլին: Մեծ կաշառքից` նախորդ տարվա դեկտեմբերի 17-ից սկսած, Էրդողանի նյարդերը լարված վիճակում էին: Անգամ Էրդողանի հարազատները իրեն չէին ճանաչում և այդ քայլով ցույց տվեց իր լարվածությունը, հիասթափությունը, ժողովրդի հանդեպ ունեցած ատելությունը»,- ասաց Անդրանիկ Իսպիրյանը:

Չնայած, թուրքագետի կարծիքով` այս միջադեպը լուրջ գործողությունների չի հանգեցնի, քանի որ ավելի լուրջ երևույթներ տեղի ունեցան, որոնցից թուրքական իշխանությունները կարողացել են չոր դուրս գալ:

«Մեկ տարվա մեջ, Թուրքիայի վարչապետ Ռեջեփ Թայիփ Էրդողանը կորցրեց իր ամբողջ հեղինակությունը` արտաքին աշխարհում, իր կողմից շատ սիրելի արաբական աշխարհում, կարելի է ասել` նաև լեգիտիմությունը: Արևմտյան գրեթե բոլոր ԶԼՄ-ներում Էրդողանին դիկտատոր են որակում,  իսկ Գերմանիայում օրերս նրան տվեցին Ֆյուրեր անվանումը»:

Ն. Ա.