Արցախի խորհրդարանում ներկայացվել է 2013թ. պետբյուջեի կատարողականը

Արցախ 19 Մայիս, 2014 17:48

ԼՂՀ Ազգային ժողովում մայիսի 19-ին պաշտոնապես ներկայացվել է 2013թ. պետական բյուջեի կատարման տարեկան հաշվետվությունը։ Ինչպես տեղեկացնում են ԼՂՀ Ազգային ժողովի մամուլի ծառայությունից, կառավարության լիազորմամբ հանդես գալով բյուջեի կատարողականի վերաբերյալ հաղորդմամբ՝ ֆինանսների և էկոնոմիկայի նախարար Սպարտակ Թևոսյանը ներկայացրել է հաշվետու տարում հանրապետության կենսագործունեության տարբեր բնագավառներում ու ոլորտներում արձանագրված ցուցանիշները, նշել զարգացման միտումները: «Կառավարության 2013թ. սոցիալ-տնտեսական քաղաքականությունը նպատակաուղղված էր մակրոտնտեսական կայունության ապահովմանը, տնտեսական աճի բարձր տեմպերի պահպանմանը, զուգահեռաբար իրականացվել են զարգացմանն ուղղված բարեփոխումները»,- նշել է Թևոսյանը:

Նախարարի հաղորդմամբ՝ հաշվետու տարում տնտեսական աճը կազմել է 9.3 տոկոս, անվանական արտահայտությամբ համախառն ներքին արդյունքը (ՀՆԱ)՝ 168.6 մլրդ դրամ՝ նախորդ տարվա 150 մլրդ դրամի դիմաց: Մեկ շնչի հաշվով ՀՆԱ-ն կազմել է 1137.9 հազար դրամ՝ նախորդ տարվա 1023 հազար դրամի դիմաց։ Պետական բյուջեի սեփական եկամուտները կազմել են 27919278.5 հազար դրամ կամ նույն ժամանակահատվածի ծրագրով նախատեսված մուտքերի մակարդակի 88.6 տոկոսը։ Բյուջետային միջոցների հաշվին իրականացվել են 69623156.1 հազար դրամի ծախսեր՝ նախատեսված ծրագրի 97.1 տոկոսը: Պետբյուջեի դեֆիցիտի ֆինանսավորման աղբյուր են հանդիսացել բյուջեի փոխառու միջոցները և բյուջեի տարեսկզբի ազատ մնացորդը, ամբողջությամբ ստացվել է ՀՀ-ի կողմից տրամադրվող միջպետական վարկը:

Նիստում ելույթ է ունեցել նաև վարչապետ Արա Հարությունյանը` պարզաբանելով հաշվետու տարում պետական բյուջեի իրականացման մի շարք առանձնահատկություններ: Այնուհետև վարչապետն ու ֆինանսների և էկոնոմիկայի նախարարը պատասխանել են պատգամավորների հարցերին, որոնք վերաբերել են նախորդ տարվա կատարողականի առանձին դրույթների:

Նիստի ավարտին հայտարարվել է, որ խորհրդարանի մշտական հանձնաժողովներում և պատգամավորական խումբ-խմբակցություններում 2013թ. պետական բյուջեի կատարողականի քննարկումները կմեկնարկեն մայիսի 20-ին՝ համաձայն հաստատված ժամանակացույցի:

Միջոցառումը վարել է փաստաթղթի գծով ԱԺ գլխադասային՝ ֆինանսաբյուջետային և տնտեսական կառավարման հարցերի մշտական հանձնաժողովի նախագահ Արպատ Ավանեսյանը: Ներկա են եղել ԱԺ նախագահ Աշոտ Ղուլյանը, վարչապետ Արա Հարությունյանը, ԱԺ փոխնախագահ Արթուր Թովմասյանը, ԱԺ մշտական հանձնաժողովների, պատգամավորական խումբ-խմբակցությունների անդամներ, նախարարներ, գերատեսչությունների ղեկավարներ: