Բուխարեստում մեկնարկել է ֆրանսահայ արվեստագետ Սարգիսի ցուցահանդեսը

Մայիսի 15-ին Բուխարեստում բացվեց ֆրանսահայ արվեստագետ Սարգիսի (Sarkis) «Ծիածանի մյուս կողմում» ընդհանուր խորագրով ցուցահանդեսը` քաղաքի միանգամից երեք ցուցասրահներում: Յուրաքանչուր ցուցադրություն ներկայացնում է աշխարհընկալման տարբեր շերտ, անցյալի և ներկայի խառնուրդ, և իրար շաղկապում քաղաքի նորագույն պատմությունն ու ժամանակակից արվեստը խորհրդանշող երեք վայր` Ռումինացի գյուղացու ազգային թանգարանը (Museu m of the Romanian Peasant), Ժամանակակից արվեստի միջազգային կենտրոնը (The Ark) և Ժամանակակից արվեստի ազգային թանգարանը (National Museum of Contemporary Art):

Ռումինացի գյուղացու ազգային թանգարանում «Արևածագից մթնշաղ» խորագրով ցուցադրությունը ներառում է «լուսանկարներ մարդկանց, ովքեր արդեն գոյություն չունեն, նրանց պատկանող իրեր ու հագուստներ»` բնակեցնելով դրանք ժամանակին այլ մարդկանց պատկանող թանգարանային իրերի մեջ: Ցուցահանդեսի «Հիշողությունը կենդանի է, հուշերը` սառած» խորագրով երկրորդ փուլում Սարգիսը ներկաների դատին է հանձնում «քաղաքակրթությունների բախման գանձերը»` ծավալով ու ինստալացիայով. ցուցադրությունը նեոնային լույսերով շաղկապված քանդակների, լուսանկարների և ջրանկարների մի համադրություն է: Երրորդ փուլը, որը կրում է «Երկնքի և երկրի միջև» խորագիրը, ներառում է կյանքի տարբեր փուլերում արված ստեղծագործություններ:

Սարգիսը ծնվել է 1938թ., Ստամբուլում, իսկ 1964թ-ից բնակություն է հաստատել Ֆրանսիայում: Նա կոնցեպտուալ արվեստի արդի խորհրդանշական ներկայացուցիչներից է, ցուցահանդեսներ է ունեցել աշխարհի ամենահայտնի սրահներում ու թանգարաններում, որոնց թվում` Ժնևի ժամանակակից արվեստի թանգարանում, Փարիզի Լուվրի թանգարանում, «Պոմպիդու» կենտրոնում և այլուր:

Ծիածանը Սարգիսի պատկերացանկի վերջին տարրերից է: Շատ հավատալիքներում ծիածանը բացարձակի խոստում է, կամուրջ դեպի դրախտ: Այն երկրորդ շանսի կամ նոր սկզբի առաջարկ է: Սարգիսի ծիածանն անկանոն է, ինչպես ժամանակակից աշխարհը: Որոշ առասպելներ պատմում են, թե ինչ է գտնվում, իսկ Բուխարեստի ցուցադրությունը հրավիրում է պատկերացնել, թե ինչ կարող է գտնվել ծիածանից այն կողմ:

Ցուցահանդեսը կազմակերպվել է Բուխարեստի Ֆրանսական ինստիտուտի ջանքերով: Բացման արարողությանը ներկա էին Ռումինիայում Հայաստանի և Ֆրանսիայի դեսպանները: Ցուցահանդեսը ըստ թանգարանների` տևելու է մինչև սեպտեմբերի կեսերը: