Հայաստանում անցկացվել է «Կոտրենք կարծրատիպերը» միջազգային երիտասարդական ծրագիրը

Հայաստանից, Վրաստանից, Ֆրանսիայից, Իտալիայից, Գերմանիայից, Լեհաստանից ժամանած 30 երիտասարդներ մայիսի 6-16-ը մասնակցել են «Կոտրենք կարծրատիպերը» խորագրով երիտասարդական փոխանակման ծրագրին:

Ծրագիրը ֆինասավորվել էր Եվրամիության «Երիտասարդությունը շարժման մեջ» (Youth in Action) ծրագրի շրջանակներում:

Համատեղ թիմային աշխատանքների և դասընթացների միջոցով երիտասարդները հնարավորություն են ունեցել զարգացնել իրենց գիտելիքները միջմշակութային հաղորդակցության, ինչպես նաև միմյանցից տարբեր 6 մշակույթների վերաբերյալ և ավելի լավ ծանոթանալ միմյանց հետ: Փոխանակման ծրագիրը մասնակիցներին տվել է եզակի հնարավորություն` 10 օր ապրել միասին մի տանիքի տակ, միասին ժամանակ անցկացնել` կոտրելով առկա կարծրատիպերը մասնակիցների երկրների, մշակույթների և ավանդույթների վերաբերյալ:

Մասնակիցների մեծ մասն առաջին անգամ էր Հայաստանում, ընդ որում` նրանց մի մասն առաջին անգամ էր մասնակցում «Երիտասարդությունը շարժման մեջ» ծրագրին:

Հյուրընկալող կազմակերպությունը` «Կրթական և մշակութային կամուրջներ» ՀԿ-ն, ծրագրի շրջանակներում կազմակերպել էր մշակութային օր, որի ընթացքում մասնակիցները այցելել են Հայաստանի կարևոր մշակութային և պատմական վայրեր` Խոր Վիրապ, Նորավանք, Արենի եկեղեցի և գյուղ, որը հայտնի է հայկական գինիով: Այցի ընթացքում մասնակիցները հյուրընկալվեցին նաև Արենու գինու գործարանում, որտեղ և համտեսել են հայկական անուշահամ գինիներ: Մասնակիցները հնարավորություն են ունեցել այցելել նաև Հայաստանի ազգային պատկերասրահ և ներկա լինել դասական համերգի:

Մասնակիցները ոչ միայն բացահայտել են հայկական մշակույթը, այլև ծանոթանացել մյուս մասնակից երկրների մշակույթներին: «Ծրագիրը շատ հաջող անցավ: Բոլոր մասնակիցները տաղանդավոր երիտասարդներ էին, ովքեր հիանալի թիմ ստեղծեցին: Ներքին մթնոլորտը թիմում շատ ջերմ և ընկերական էր, որը հնարավորություն տվեց երիտասարդներին ինչպես հեշտությամբ շփվել միմյանց հետ, այնպես էլ սովորել միմյանցից», - նշել է ծրագրի համակարգող Արփինե Կոստանյանը: