Հայրենիքը յուրաքանչյուր հայի համար դառնալու է ապահով հանգրվան. Հովիկ Աբրահամյան

Հայաստանի Հանրապետության կառավարությունը, որպես իր գործունեու­թյան գերակայություն, հռչակում է Հայաստանի Հանրապետության քաղաքա­ցուն` նրա ազատության երաշխավորումը, անվտանգության և բարեկեցության բարձրացման ապահովումը: Այս մասին Ազգային ժողովում ասաց ՀՀ վարչապետ Հովիկ Աբրահամյանը՝ ներկայացնելով կառավարության ծրագիրը: «Հայաստանի Հանրապետության կառավարության ջանքերն առավելապես ուղղվե­լու են Հայաստանի Հանրապետության քաղա­քացու' ստեղծագործ աշխատանքով իր հայրենիքում իր ապագան կերտելուն»,- ասաց նա՝ ընդգծելով, որ կառավարությունը բոլոր հնարավոր եղանակներով պայքարելու է աղքատության և արտագաղթի դեմ: Հայրենիքը յուրաքանչյուր հայի համար դառնալու է ապահով հանգրվան և սեփական կարողու­թյունների, աշխարհի տարբեր ծայրերում կուտակած փորձի ու գիտելիքների առավելագույնս դրսևորման հնարավորության երկիր: Ըստ նոր ծրագրի՝ Հայաս­տանը յուրաքանչյուրի համար պետք է դառնա արժանա­վայել կյանքով ապրելու հնարավորությունների երկիր: ՀՀ վարչապետն ընդգծեց, որ միայն հավասար պայմաններ և իրական մրցակցություն ապահովող միջավայրն է, որ հնարավորություն կտա Հայաստանի Հանրապետության քաղաքացու մեջ արմատավորելու հավատն իր երկրում վաղվա օրվա, հպարտության զգացում հայրենիքի նկատմամբ: «Միայն հասարակության կողմից արդարացիորեն ընկալվող տնտեսական համակարգն է ունակ ապահովելու ներդրումների աճ, ապագայի նկատմամբ հավատով լեցուն, համարձակ կառու­ցողական քայլերի նախաձեռնում»:

Նման տնտեսական միջավայրի հրամա­յա­կանը Հայաստանի Հանրապետության կառավարությունը պետք է իրագործի թե´ երկարաժամկետ հեռանկարում՝ սահմանադրական բարեփոխումների միջոցով աջակցելով բնականոն քաղա­քական փոփոխությունների պայմաններում կայուն տնտեսական միջավայրի պահպանմանը, թե´ անմիջապես՝ տնտեսական միջավայրի առկա խեղաթյուրում­ների դեմ կտրուկ և հետևողական քայլեր ձեռնարկելու միջոցով: Ծրագրում ընդգծվում է սահմանադրական բարեփոխումների կարևորությունը' ելնելով իրավունքի գերակայության սկզբունքի իրացման, մարդու հիմնական իրավունքների և ազատությունների երաշխավորման սահմանադրական կառուցակարգերը կատարելագործելու, իշխանությունների լիարժեք հավասարակշռումն ապահովելու և հանրային կառավարման արդյունավետությունը բարձրացնելու անհրաժեշտությունից: ՀՀ վարչապետն ընդգծեց, որ անհրաժեշտ նախադրյալներ պետք է ստեղծվեն՝ սահմանադրական կայունության ամրապնդման, Հայաստանի Հանրապետության Սահմանադրության գերակայության և սահմանադրականության հաստատման համար:

Ազգային ժողովը սկսել է կառավարության նոր ծրագրի քննարկումը: Կառավարության ծրագիրը ներկայացնում է ՀՀ վարչապետ Հովիկ Աբրահամյանը: