Այսօրվա խորհրդարանական ուժերը շարժվում են «ինչքան վատ, այնքան լավ» սկզբունքով. Հովիկ Աբրահամյան

ՀՀ կառավարության նոր ծրագիրն ունի նոր ասելիք՝ դրանք իրագործելու մեխանիզմների, գործիքների առումով: Այս մասին քիչ առաջ Ազգային ժողովում` նոր կառավարության եռամյա ծրագիրը պատգամավորներին ներկայացնելիս, հայտարարեց ՀՀ վարչապետ Հովիկ Աբրահամյանը:

Նա նշեց, որ կառավարության նոր ծրագիրը լինելու է իրատեսական, բայց ոչ հավակնորդ, խստապահանջ, բայց ոչ անտարբեր, ականջալուր և իր քաղաքական գծին հետամուտ:

«Եթե անհրաժեշտ լինի հարկային արտոնություններ, դրամաշնորհներ, դրանք անպայման կլինեն, բայց կարվեն հրապարակային ու օրենքով: Մենք չունենք կախարդական փայտիկ, որ ավելացնենք, օրինակ, կրթության համար նախատեսված ծախսերը, բայց ունենք պատրաստակամություն` քննարկելու ցանկացած առաջարկ»,- ասաց Աբրահամյանը:

Հովիկ Աբրահամյանի խոսքով՝ ուշադրություն է դարձվելու ՏՄՊՊՀ-ի օրենսդրությանը, բնակչությանն անհանգստացնող ճանապարհային երթևեկության կանոնների զանցանքի չափի անհամաչափությանը, կրթության ու առողջապահության ոլորտների հավասարաչափ զարգացվածությանը Երևանում ու մարզերում:

Նա նշեց, որ վերահսկողական գործառույթները չեն տրվում ընդդիմությանը, քանի որ այսօրվա խորհրդարանական ուժերը շարժվում են «ինչքան վատ, այնքան լավ» սկզբունքով:

Նա ընդգծեց, որ կառավարությունն իր գործունեության գերակայությունն է հռչակում ՀՀ քաղաքացուն: «Քաղաքացին է մեր ուշադրության կենտրոնը, նրա մտահոգություններն են մեր ուշադրության առարկան: Մենք անելու ենք ամեն ինչ, որ պայքարենք արտագաղթի դեմ: Մեկ հարվածով կամ գործիքով իհարկե դա անհնար է վերացնել: Կառավարությունն իր ջանքերն ուղղելու է ՀՀ քաղաքացու ստեղծագործ աշխատանքն իր հայրենիքում իր ապագան կերտելու գործընթացին»,- ասաց նա' հավելելով, որ կառավարությունը խնդիրների լուծման համար ակնկալում է քաղաքական ուժերի ու հասարակության աջակցությունը: