Ձվերը պատգամավորի ուշադրության կենտրոնում են (լուսանկար)

Հայաստանում ձվերի շուկան կարծես թե չի կայունանում. դեռևս շարունակվում է ներկրված հավկիթի վաճառքը։  Հատկապես տեղական արտադրողները մրցակցության հարց են բարձրացնում, քանի որ անհավասար մրցակցային պայմաններ է առաջանում, երբ ներմուծված և տեղական արտադրության ձվերի վրա տարբեր ժամկետներ են դրվում` տեղական արտադրողները 25 օր են նշում, իսկ կան որոշ ներմուծողներ, որոնք նշում են 60 օր: Տեղեկությունը մի առիթով տարածել է  ՏՄՊՊՀ-ի նախագահ Արտակ Շաբոյանը:

Գյուղատնտեսության նախարարության սննդամթերքի անվտանգության պետական ծառայությունն էլ վերջերս տեղեկացրեց, որ շուկայում հայտնաբերվել է չմակնշված ձվերի խմբաքանակ:

Ձվերի շուկայի անկայունությամբ և առկա իրավիճակով մտահոգված է նաև ԱԺ ՀՀԿ-ական պատգամավոր Սամվել Ֆարմանյանը:

Պատգամավորին հատկապես զարմացրել կամ մտահոգությունների տեղիք է տվել ձվերի դեղնուցների գույների տարբերությունը: Նա պարզել է, որ երեք ձվի դեղնուց հիմնովին տարբեր երանգավորում ունեն: Եվ, ոչ ավել, ոչ պակաս, նկարել և ներբեռնել է դրանք սոցիալական ցանցերում:

«Ինչպե՞ս է դա հնարավոր», - նման հռետորական հարց է բարձրացրել Ս. Ֆարմանյանը:

Իսկ թե արդյոք Ազգային ժողովում կբարձրացնի ձվերի հարցը, դժվար է ասել, բայց ակնհայտ է, որ ձվերը պատգամավորի ուշադրության կենտրոնում են հայտնվել:

Ն. Ա.